15 Mar 2019 10:55

inkhel

​Whatsapp kaltlanga banna theh lut Scholes; Oldham a thawng

Manchester United midfielder hlui; football pundit leh manager ni ta Paul Scholes chuan thlakhat vel awrh Oldham Athletic a enkawl hnuah banna a theh lut lehnghal.

Scholes hian Oldham hi game sarih bak a khelhpui hman lova, an game hmasa bera an chak tih loh chu hnehna chan an nei lo. Scholes hian a game hmasa berah Yeovil Town chu 4-1 in a hneh nghala, beiseina sang hle mahse game thum dangah tlawmin, game thum dangah an tumpuite an inhnehtawkpui bawk.

Sky Sports tarlan danin Scholes hian whatsapp kaltlangin a banna a thehlut a, Oldham chairman Abdullah Lemsagam chuan an manager a ban hi a beisei lawk lo hle bawk. A ban tur chungchangah Scholes hian Oldham hotute tu mah a be lo niin Sky Sports chuan a tarlang tel.

Oldham chairman Lemsagam chuan, “Oldham Athletic chu Paul-a ban chungchangah kan lawm lova, a ban chhan a tarlan chuan min thawng hle bawk.

“Club chuan Paul hi kan theih ang tawkin kan thlawp a, a ban hma hian ban a duh tih hi engti kawng mahin a tilang lo. A ban chhan sawi mumal a nei lova, text message hmangin a ban thu a sawi bakah sawizui a duh lo bawk.

“Manager hna chelh hi thil awlsam a ni lova, mahse buaina ching fel turin Paul hi thawhpui kan inhuam em em bawk. Duhsakna kan hlana, a hnathawhah lawmthu kan sawi bawk. Manager thar zawn hna kan thawk nghal ang,” a ti.