16 Sep 2020 03:57

inkhel

Western Conference final-ah Denver Nuggets

Denver Nuggets chuan Western Conference semi final-ah Los Angeles Clippers chu an lehthal a, final an lut a. 2009 hnua final an luh leh theih hmasak ber a ni a, Clippers hi kum 50 zet an club a din tawh hnuah final an la lut miah lo thung.

NBA Western Conference semi final best-of-seven series an khelhah Nuggets chu 1-3 in an hniam hman a, an khingpui Clippers chu an lehthal leh thei a. NBA team zingah chuan 1-3 a hnufual hnua chak leh thei pathumna an ni a, 1985 ah Kansas City Royals chuan an khingpuite an lo lehthal tawh a, 2003 ah khan Minnesota Wild pawhin an lehthal tawh bawk a ni.

Nuggets tan hian Jamal Murray leh Nikola Jokic te chu an langsar hle a, Murray hian point 40 a thun a, Jokic chuan triple-double a nei thei a. Jokic hian point 16 a thun bakah assist 13 neiin rebound 22 a la bawk a, Nuggets player zingah chuan playoff bika rebound la hnem ber a ni.

Game 7 ah hian Denver chu 104-89 in an chak a, series hi 4-3 in an la thei ta a, conference final-ah hian LeBron James telna Los Angeles Lakers nen an inkhel ang.

Kawhi Leonard leh Paul George te tel mah se Clippers chu an chak zo ta ngang lo a. Leonard hian point 14 a thun a, George chuan point 10 a thun ve bawk a ni.

Hmun dangah Jimmy Butler chuan second 12 chauh a awm tawh tihin three-point a thun a, Miami Heat chuan 117-114 in Boston Celtics an hneh theih phah a, Eastern Conference finals-ah hian Heat chuan 1-0 in hma an hruai theih phah a ni.

Jayson Tatum chuan Celtics tan point 30 a thun a, Marcus Smart chuan point 26 a thun a, Kemba Walker chuan point 19 a thun a, Jaylen Brown pawhin point 17 a thun bawk a. Heat tan Goran Dragic chuan point 29 a thun a, Jae Crowder chuan point 22 a thun a, Jimmy Butler chuan point 20 a thun bakah Adebayo pawhin point 18 a thun bawk a ni.