Tun season-ah a vawikhat nan kar liamtaa Tottenham laka an tlawm hnuah Chelsea chu hnehna nen West London Dderby-ah an rawn kir a, Chelsea hian Stamford Bridge-ah an thenawm club Fulham lo mikhualin, 2-0 in an chak.
Chelsea tan inkhel tan tirah Pedro chuan goal a khunga, second half-ah Ruben Loftus-Cheek chuan goal khat dang a thun belh leh. Chelsea hian khelh 14-ah point 31 hlawhchhuak tawhin, an ni aia khelh khata khel tlem Tottenham lehpelin pathumnaah an awm. Fulham hian khelh 14 atangin point riat chiah an la hlawhchhuaka, Premier League mawngphahah an awm thung a ni.
Chelsea 2-0 Fulham
(Pedro 4’, Loftus-Cheek 82’)
PLAYER RATINGS
Chelsea: Kepa 7, Alonso, Azpilicueta 6, Luiz 6, Rudiger 7, Kante 8, Jorginho 7, Kovacic 6, Pedro 8, Hazard 7, Giroud 5. Subs: Loftus-Cheek 7, Morata 4, Zappacosta 5.
Fulham: Rico 7, Sessegnon 5, Odoi 5, Mawson 6, Le Marchand 6, Chambers 8, Christie 6, Seri 6, Johansen 7, Cairney 6, Mitrovic 5. Subs: Ayite 5, Kamara 6. Kebano 5.
Match Report
Inkhel tan a ni a, team lian zawk Chelsea-in goal an khung nghal. Fulham-in anmahni half-ah ball in pass-in, N’Golo Kante chuan Seri chu ball a chhuhsak a, French midfielder hian khalhin, box chhung dinglama awm Pedro a pe a, Pedro hian defender pakhat bumin, goal-ah a chhuih goal. Minute sawm chuang khelh a nihin Fulham lamin Chelsea an nawr a, mual veilam atangin box pawn goal zawna awm Callum Chambers pek a ni a, Chambers hian goal-ah pet mahse Chelsea goalkeeper Kepa Arrizabalaga a zawn hle a, Kepa a buai lem lo.
Minute sawmhnih chuang khelh a ni a, Chelsea-in chance tha hmu in, Eden Hazard chuan mual veilamah ball a khalha, box chhunga inpawt lut Olivier Giroud pe in, French striker hian a pet a, mahse Fulham keeper Sergio Rico chuan a save. 37mins bawrah Chelsea-in chance nei lehin, Fulham tihsual atangin ball an chang a, box chhung dinglam atangin Matteo Kovacic chuan cross-in Giroud chuan lo khawih mahse, a hlauhawm hran lo. Half time hma lawkin Chelsea bawkin hun tha tak an nei leha, Fulham box pawnah ball in pass kualin, box chhunga tlan lut tur Cesar Azpilicueta chu ball pek a ni a, ani hian ball khalhin lei hrulah ball a cross a, Giroud chuan lo tlawh mahse Rico bawk chuan Fulham a chhanhim. First half hi 1-0 a tihtawp zui a ni.
Second half khelh tan a ni a, minute thum vel a ral tihah Chelsea lamin chance an nei nghala, Pedro chuan ball khalhin box pawn atangin a pet a, Rico-a’n a lo save. Hemi hnu deuh lawk hian Fulham chuan corner an hmu a, corner atanga ball vawrh luh chu Chambers chuan tha takin a lo tauh a, mahse khawvela keeper manto ber Kepa chuan a lo save tha hle. Darkar khat khelh a nihin Chelsea-in free kick an hmu a, Marcos Alonso chuan petin, Rico-a’n a lo man. Darkar khat chuang hret khelh a nihin Fulham-in an ti goal teuh hle a, mual dinglam atanga pass lokal chu box chhungah Cairney chuan a lo la, a ni hian Chambers pe in, Chambers hian a pet nghal a, pet tha hle mahse Kepa bawk chuan a lo save.
70 mins chhovah Chelsea manager Maurizio Sarri chuan Giroud la chhuakin Alvaro Morata a dah luta, Morata hi a rawn luh hnu lawkah chance tha tak a hlah nghal. Hazard chuan Fulham box hmawrah ball khalhin goal-ah a pet a, Rico chuan lo save perin, Morata a rawn tlana, ball rawn pet mahse a pet kang luaha, a goal lo chiang hle. 80 mins khelh a ni chhova, game thununtu Chelsea chuan an goal hnihna an khung. Fulham box hmawrah Chelsea hi ball in pe kualin, Hazard chuan changtu nei mumal lo Ruben Loftus-Cheek chu ball pe in, Loftus-Cheek hian ‘cool’ takin a chhuih goal. Inkhel hmuhnawm tak a ni hran lova, Chelsea thiampuipa Hazard pawh nidang a ang lo hle. Inkhel hi 2-0 a tihtawp a ni.
