2015/16 Premier League-a an match hmasa berah Arsenal chuan West Ham si hnih faiin an hneh lo. Arsenal hian Emirates Stadium-ah West Ham an mikhual a, Hammers tan Kouyate leh Zarate ten goal an khung a ni.
Goal hmasa zawk hi first half hun tawp dawna lut a ni a, free kick atangin Kouyate chuan a tauh lut, goal hnihna hi second half 57th-a lut niin, box pawn atangin Zarate chuan a pet goal mawi hle.
Arsenal 0 - 2 West Ham United
Cheikhou Kouyate 43', Zarate 57'
Arsenal : Cech, Debuchy (Sánchez - 67' ), Mertesacker, Koscielny, Monreal, Ramsey, Coquelin (Walcott - 58' ), Oxlade-Chamberlain, Özil, Cazorla, Giroud
West Ham : Adrián, Tomkins, Reid, Ogbonna, Cresswell, Oxford (Nolan - 79' ), Kouyaté, Noble, Payet, Sakho (Maiga - 90' ), Zárate (Jarvis - 63' )
Arsenal hian Pre-season an hmang tha hle a, league tan tak tak hmain pre-season trophy pathum ngawt an chawi hman. Beisei sang takin Premier League bul an tan, mahse si hnih faiin Bilic leh a hoten an hneh lo hlauh mai.
Arsenal chak loh danah hian tun nupui bazara Wenger-a lak thar Petr Cech chuan mawh a phur nasa bik hle niin a lang a, goal hmasa zawk luh danah a zuang chhuak sual a, goal hnuhung luhnaah pawh a positioning a dik tawk lo bawk a ni.
Goal hmasa zawk hi first half tawp tep 43rd mins-a lut a ni a, Dimitri Payet-a free kick tha zet chu Cech chuan khawih fuh tumin a zuang chhuak. Mahse a khawih hmain Cheikhou Kouyate chuan a tauh goal ta si a. Goal hnihnaah hian Arsenal defence thiam loh a nih rualin, Cech kha a positioning lo dik selang chuan a save thei ngei tura rin a ni a.
57th mins-ah Arsenal defender ten awlsam takin defensive third-ah ball an hloh. Coquelin ball hloh chu Zarate chuan changin, box pawn atangin a shot chhunzawm, lei hrulah kalin, near post-ah a thlawk lut, si hnih faiin Arsenal chu an chak lo ta a ni.
Arsenal an khel chhe em em hran lo, hetih lai hian attacking third-ah an che fuh hleithei lova. Aaron Ramsey chuan first half-ah cross bar a pet per dawp a, Oxlade-Chamberlain pawh a hmuhnawm kher mai, chutih laiin West Ham tan Payet a khel tha rem rem hle a, Hammers hmatawng chakna a ni chiang mai. Goal venhim lamah Tomkins leh Oxford te chuan Arsenal hmatawng an dang hnem malh malh hle bawk.
Reece Oxford hi a naupang hle a, Premier League-a khel naupang ber a ni nghe nghe, he midfielder hian zanina Arsenal a hmachhawn khan kum 16 leh ni 237 a ni a, defence a pui tha em em a, pass acuracy 95% lai a nei a, tackles won vawi thum leh interception vawi thum a nei nghe nghe. Hammer player zinga khel tha ber pakhat a ni bawk.
Sam Allardyce thlakin kum 46 mi Bilic chuan Premier League match hmasa berah Arsenal a hneh nghal pang mai le. West Ham chu Europa League Group stage luhpui thei lo mahse Bilic leh a hote hian attacking football hmuhnawm tak min entir dawn niin a lang.