11 Jul 2019 12:25

bakteaJr.

Mizo tlangval

​West Ham-in Higuain lakluh an tum

Premier League club West Ham chuan Juventus atangin Argentine striker Gonzalo Higuain chu loan-a lakluh an tum niin Sky Italia chuan a tarlang.

Higuain hian season hmasa chawhnu lam kha Premier League-a loan-in hun a hmanga, Chelsea tan a khel. Chelsea hian an duh chuan loan bawkin Higuain hi kawl chhunzawm thei mahse Juventus-ah an thawn kir leh ta zawk a, West Ham chuan Premier League lama hruai kir leh an tum mek.

West Ham hian loan-in Higuain hi lakluh duh mahse Juventus lam chuan an striker hi hralh chhuah an duh niin tarlan a ni a, a man hi pound maktaduai 36 bawr vel ni tura ngaih a ni.

Season liamta chawhnu chhung khan Chelsea tan Higuain chuan vawi 18 a khel hmana, goal nga a khung. Chelsea-a a mah lalut tu ber, Italian manager Maurizio Sarri chuan Juventus a pan a, mahse Juve-ah Sarri hian Higuain hi a mamawh em em lo niin a lang.

Tun nipui chhungin Hammers hian an forward pathum ngawt an chan tawh a; Marko Arnautovic, Andy Carroll leh Lucas Perez-te chuan London club hi an chhhuahsan vek.

West Ham hian Manchester United striker hlui Javier Hernandez an la kawl a, Hernandez erawh West Ham tan a pawimawh chho dawn hle niin a langa, tun kar khan West Ham chuan Hernandez hi jersey no.9 an pe nghe nghe.

West Ham hian Higuain hi loan-a an lalut thei lo a nih chuan an lei duh a rinawm lova, Higuain hi kum 31 a lo ni chho tawh a, a man a tlawm lo bawk nen Juve hian loan-a chhuah tir an phal ngang loh chuan Hammers hian striker dang an melh mai pawh a rinawm viau a ni.