Premier League club West Ham chuan Chelsea midfielder Conor Gallagher an dawr a, mahse Chelsea chuan West Ham hi an lo hnar tih Sky Sports chuan a tarlanga, mahse West Ham hian English midfielder hi an la ngaihven chhunzawm zel.

Hammers hian kum 23 mi manah hian pound maktaduai 40 an thehchhuak a, mahse Chelsea in an lo pawm sak lova, Chelsea hian Gallagher-a manah hian pound maktaduai 50 an duh nia tarlan a ni.

English midfielder hian Stamford Bridge-ah kum hnih daih contract a la nei a, Chelsea hian a contract hi pawhsei an duh nia sawi a ni bawk a, mahse Gallagher hian inkhelhna hmun a chang tam thei dawna a inhriat loh avangin Chelsea chhuahsan mai a hnial lo niin chanchinbu mite chuan an ziak.

West Ham hian Declan Rice an hralh avangin midfielder lakluh tur an dap mek a, Gallagher bakah hian midfielder dang melh pawh an nei nual niin a lang a, Southampton captian James Ward-Prowse, Fulham midfielder Joao Palhinha, Juventus midfielder Denis Zakaria leh Ajax midfielder Edson Alvarez te nen pawh sawizawm an ni.

Chelsea hi tun nipuiah bazar chhungin an inhralh chhuak hnem tawh hle a, midfielder ringawt pawh Mason Mount, Mateo Kovacic leh N’Golo Kante te an chhuah tir tawh a, midfielder thar lakluh an la nei lo. Gallagher hi Chelsea manager Mauricio Pochettino chuan chelh a duh niin tarlan ni mah se, Gallagher hian a inkhelh tam theihna tur pana chhuah a duh nia sawi a ni.