West Ham chuan an midfielder Declan Rice chu tu hnenah mah hralhchhuah an tum lo niin Sky Sports chuan a tarlang.

Sky Sports tarlan danin, Manchester club pahnih Manchester United leh Manchester City-te chuan Rice hi an dawr ve ve a, mahse West Ham hian heng club pahnihte dawrna hi an lo hnawlsak ve ve .

Tun season hman zawh takah khan Rice hi West Ham tan a khel tha hle a, vawi 38 lai Hammers tan inlanin, England pawhin a vawi khat nan an ko nghe nghe.

Kum 24 mi Rice hi Chelsea academy chhuak a ni a, kum 2014 khan Hammers hian an academy lamah lalutin, kum 2017 atangin senior team lamah an chhawr tan.

A tirah Rice hi centre back ni mahse tunah erawh holding midfielder a ni tawh a, defence-ah la khel thei tho mahse midfield-ah a tha zawk.

Rice hi London-a piang ni mahse a pi leh pute hi Irish an nih avangin Republic of Ireland tan youth team lamah a khel veka, senior team lamah pawh Ireland tan game thum khel hman mahse England tana khelh a thlang leh ta zawka, a duhna chu FIFA lamin pawmpuiin England tan game thum a khel tawh.

City hian Rice an lak theih tak lovah chuan Atletico Madrid atangin Spanish holding midfielder Rodri chu an lalut dawn ta zawk a, United erawhin Rice hi dawr leh an tum niin chanchinbu mite chuan an ziak a ni.