17 Oct 2020 02:27

bakteaJr.

Mizo tlangval

​West Ham-in Benrahma an la

London club West Ham chuan domestic transfer window inkhar hmain Said Benrahma chu Championship club Brentford atangin an la lut fel hman.

Hammers hian Algerian winger hi tun season chhung atan loan-in an laluta, loan-a an lakluhna manah hian Hammers hian pound maktaduai 4 an seng.

A tirah West Ham hian kum 25 mi Benrahma hi lei tur an ni a, Brentford nen pawh a man chungchangah inremna nei vek tawh mahse, Benrahma hian medical a neih laiin thil fel tawk lo a awma, West Ham hian loan-in an la leh ta zawk.

Algeria tana vawi li inlan tawh Benrahma chuan West Ham a zawm chungchang sawiin, “He team-a ka tel thei hi ka lawm hlea, West Ham hian history an ngaha, Premier League-ah pawh an awm rei tawh hle. Player tha tak tak lo nei tawh thinin, tunah pawh an la nei renga, England-a club lian tak an ni.

“Manager nen kan inbiaa, ka lak atanga a beisei pawh ka hre chiang. A beisei anga khelh ka tum dawna, a chhan chu ka chungah rinna a nghata, khelmual chhungah ka rulh let theih ngei ka beisei,” a ti.

West Ham no.9 thar Benrahma hi nipui bazar chhunga Hammers player lakluh palina a ni a, a hmain Craig Dawson, Vladimir Coufal leh Tomas Soucek te chu West Ham hian an lo lalut tawh.

5ft 8’-a sang Benrahma hi French club Nice academy-a awm thin a ni a, Nice atang hian Brenford chuan kum 2018 khan leiin, a manah pound maktaduai 3 bawr vel an seng a ni.