15 Sep 2020 09:41

bakteaJr.

Mizo tlangval

​West Brom-in Chelsea defender hlui an la lut

Premier League kaithar West Brom chuan an tlarhnung lam thawmthat nan Chelsea defender hlui Branislav Ivanovic chu an la lut fel.

West Brom hian an defender thar Ivanovic hi kum khat daih contract an ziahpuia, kum 36 mi hi tun nipui chhunga West Brom player lak luh thar parukna a ni.

Serbian defender bakah hian West Brom chuan tun nipui bazar chhungin Grady Diangana, Matheus Pareira, Cedric Kipre, David Button leh Callum Robertson te an lo la lut tawh bawka, tun season atan an inbuatsaih mek zel.

Ivanovic hi Premier League-ah a tlangnel sa hle a, kum 9 lai Chelsea tan khelin, trophy 10 a chawi hmana, kum 2017 kum tir khan London chhuahsanin Zenit Saint Petersburg a zawma, Zenit-ah hian kum 3 leh a chanve a awm hnuah Premier League lamah a kir leh ta a ni.

Ivanovic chuan, “Premier League hi khawvela league tha ber a ni a, he chona hi keima tan ka mamawha, he chona hmachhawn tur atan hian ka inpeih bawka, Premier League-a ka lo kir leh hi ka lawm hle a ni. Ka hlawhtlin ngei pawh ka ringa, ka tum a ruha, ka la that zia lan tir ka duh a, ka team tan theihtawp ka chhuah dawn a ni,” a ti.

West Brom manager Slaven Bilic chuan Ivanovic an lak chungchang sawi bawkin, “Kan la lut thei hi a lawmawm hle a, Premier League-a kaithar kan ni bawk nen kan player mamawh tak a ni. Career hlawhtling tak a nei a, kan la lut hi kan lawma, kan team tan khelmual chhung leh pawnah quality leh experience a rawn keng lut dawn.

“Kan la lut hi kan team a defender dangte tan a that dawn mai bakah, team tan a tha lamin nghawng a nei ngei ang. Hetiang avang hian kan lak luh tum ber zinga mi a ni a, kan tan signing tha tak a ni,” a ti.