12 Aug 2019 11:27

inkhel

Wesley Sneijder a chawl

Dutch midfielder Wesley Sneijder chuan professional football khelh a chawlhsan thu a puang.

Wesley Sneijder chuan khelmual chhunga hun hman a tum zui tawh loh thu sawiin, football khelh chu a bansan ta a. An khaw club Utrecht ho stadium chhunga ama puala skybox a neih atangin inkhel chu hahdam deuhin a en thin tawh dawn a ni.

Kum 35-a upa Sneijder hian thla 18 chhung atan Qatar club Al-Gharafa ah contract a ziak a, July thla khan a contract hi a tawp a, hemi hnuah hian khelhna a nei zui ta lo a. Eredivisie club Utrecht nen thawhhona thuthlung an ziak zui a ni.

Sneijder chuan, “Utrecht khawpui hi ka hmangaih a, sawi thiam harsa khawpin he khua hi ka duh a ni,” a ti a.

“A hma daih atangin tawhin helai hmuna ka kal theih hun turte hi kan sawi thin a, tunah chuan kan thil lo suangtuah tawh thin chu a takin a thleng thei ta a. Season thar bul tan vat vat a nghahhlelhawm tawh khawp mai,” a ti bawk.

2002 kumah khan Wesley Sneijder hian Ajax-ah bul a tan a, hemi hnuah hian Real Madrid, Inter Milan, Galatasaray leh Nice velah te a khel kual a, Europe khawmualpui chu a hrut kual hnem hle.

Season hnih chhung Real Madrid ah a khel a, 2007-08 season-ah khan La Liga title a lakpui a, 2009 nipui lai khan Inter Milan lamah a kal zui leh a. 2009-10 season chhungin Jose Mourinho hnuaia player pawimawh ber pawl a ni a, a club chu treble champion a nihpui a, Serie A, Coppa Italia leh UEFA Champions League title a lakpui thei a ni.

Sneijder hian Netherlands chu 2010 World Cup final a luhpui a, final-ah hian Spain chu 0-1 in an hneh lo a, he tournament chhunga player tha ber dawttuah an thlang a, Silver Ball a dawng a. Hemi kumah hian Ballon d’Or dawng thei tura mi pathum an chhawp chhuah zinga a tel loh avangin thawm a nei deuh hat a ni.

An ram tan hian Sneijder chuan 2003 leh 2018 inkarah vawi 134 a khel hman a, Dutch player zingah chuan ram tana khel hnem ber a ni.

Inter Milan chu treble champion a nihpui hnuah Coppa Italia leh Super Cup a lakpui zui leh a, hemi hnuah hian Turkish club lian Galatasaray lam a pan a, hetah hian kum nga zet chu a khel zui a ni.

Galatasaray hi Sneijder chuan Super Lig title vawi hnih a lakpui bakah Cup vawi thum a lakpui hman bawk a. Ligue 1 club Nice a zawm leh a, French club tan hian game 5 chiah a khel hman a, Al-Gharafa chu a zawm leh daih a, QSL Cup a lakpui leh hman bawk a ni.