​Werner-a tan Liverpool aiin Chelsea emaw United emaw pan a tha zawk ang: Hamann

22nd February 2020, 06:02AM

Liverpool leh Germany midfielder hlui Dietmar Hamann chuan RB Leipzig striker Timo Werner-a tan Liverpool aiin Chelsea emaw Manchester United emaw pan a that zawk a rin thu a sawi.

Kum 23 mi German striker Werner hian tun hnaiah club lian zawkte mit a la hle a, thla hmasa mai pawh khan Chelsea chuan an dawr niin chanchinbu mite chuan an ziak a, Leipzig-ah cham chhunzawm mahse season tharah erawh Werner hian club thar a zawm ngei a rinawm tawh.

Werner hi Chelsea bakah Liverpool leh Manchester United te nen pawh sawizawm a ni nasa hle a, a mah ngei pawhin Liverpool nena sawizawm an ni chu a lawm thu a sawia, Liverpool chu tunlaia football club tha ber an nih thu pawh a sawi nghe nghe.

Bayern Munich leh Manchester City tan te pawh lo khel tawh thin Hamann chuan, “Timo Werner hian hma a sawn chhunzawm renga, Champions League-ah pawh goal khung lehin, Bundesliga lamah pawh goal 20 chuang tun season-ah a khung tawh.

“Team lian zawka a khelh thuai pawh ka beisei pui hle a, Liverpool nena sawizawm a ni pawh hi a tan chuan inchhuanna tham a ni reng a ni. Mahse Liverpool hi pan ta se, a tan a tha ber ang em tih zawhna a awm.

“Ka hmuh dan chuan a lai atanga goal a nawra, a hmanraw thaw ber, a speed a hman hian a tha bera, Liverpool-ah erawh Roberto Firmino a awm sa a, Liverpool hian striker tha tak, a team te nena inman em em sa an nei.

“Werner hi Liverpool-ah a kal a nih chuan a laiah khelhna hmun a chan dawn loh avangin a sirah a tlan a ngai dawna, Liverpool hian a sira khel tur bawn tak pahnih Sadio Mane leh Mohamed Salah te an nei. An pathum zinga mi pakhat hi an inhliam emaw an chhuak emaw a nih ngawt loh chuan Werner hian khelhna hmun a chang dawn lova, chu chu a duh ka ring hauh lo.

“Liverpool pan hi chakawm hle dawn mahse ka hmuh dan chuan Werner-a tan hian Chelsea emaw Manchester United emaw pan se a thatpui zawk ka ring a ni,” a ti.

Copyright © inkhel.com 2024. All rights reserved.