Wenger hi Chelsea enkawl tur chuan a tha khawp ang: Seaman

21st February 2019, 03:02AM

David Seaman chuan Arsene Wenger chu Chelsea manager Maurizio Sarri thlaktu atan a that ber a rin thu a sawi.

Arsenal goalkeeper hlui David Seaman chuan kum 22 zet Arsenal lo enkawl tawh Arsene Wenger chu Stamford Bridge lamah pawh tha viau tura a ngaih thu a sawi a. Chelsea lama dinhmun derthawng chho mek Maurizio Sarri an ban a nih chuan a hmun ruak luah tur hian Wenger chu tha ber tura a ngaih thu a sawi a ni.

Tun hnaiah Sarri hnuaiah Chelsea chu an che fuh thei lo hle a, hei vang hian Sarri dinhmun hi a derthawng sawt viau a. A hma lawkin Manchester City in 6-0 in an sawp a, Thawhtanni khan FA Cup ah Manchester United chuan 2-0 in an hneh leh bawk a, hetiang a nih takah chuan Chelsea tantute mai bakah staff te pawhin an sawisel luai luai tawh a ni.

Seaman chuan Stamford Bridge-ah hmun ruak a awm ta a nih chuan Wenger chu lut thei se tha dawn riaua a hriat thu sawiin, Premier League khawvelah Wenger hian tih tur hmabak a la nei nia a hriat thu a sawi.

England goalkeeper hlui Seaman chuan, “Arsene hian Arsenal a hmangaih em avangin football club enkawl leh dawn pawh ni se Premier League-ah chuan a let leh tawh loh tur thu a sawi thin a. Club dang enkawl chunga Arsenal hmachhawn chu a dik thei dawna a hriat loh vanga hetianga sawi hi a ni,” a ti.

“A hmain hetiang hian lo sawi tawh mahse hun hian thil chu a liampui zel a, hun a kal zel a, rilru put hmang te pawh kan lo thlak ve zel bawk a. Nakinah chuan England ram league lama kir leh a, amah ringlotute chu an dik lohzia hmuhtir a la duh thei tlat a ni,” a ti bawk.

A sawi zelnaah, “Ka tan chuan Arsene an sawisel vak vak mai hi ngaihthlak a hrehawm a, a hma zawnga a thawh that tawhna te hmu tha duh loa, tun hnaia a chet fuh lohna lai chauh an kher an kher mai hi a tha lo ka ti tak zet a ni,” a ti.

David Seaman chuan, “Tun dinhmunah Chelsea chuan manager an nei lo mai dawn niin a lang a, an game khelh leh tur pathum chuan an dinhmun tur a hril chiang dawn niin a hriat theih a. Chutiang hunah chuan Wenger hi han dah hmasa ber mai se an tih fuh ka ring tlat a, Premier League-ah hian kir leh se ka ti tak zet a. A nihna takah chuan hetiang thleng tur hian beisei erawh a sang lutuk lo a ni,” a ti.

Copyright © inkhel.com 2024. All rights reserved.