07 Nov 2019 05:22

inkhel

Wenger hi a tar tawh mah mah: Marcel Desailly

Chelsea leh France defender hlui Marcel Desailly chuan Bayern Munich manager ni thei tura an sawi mek Arsene Wenger chu club enkawl tur chuan a upa tawh mah mah niin a sawi.

Kum 70-a upa Arsene Wenger chu Pathiannia Bayern Munich manager an ban tak Niko Kovac thlak theitu tura rin kai ber niin an sawi mek a. A tir taka an beisei ber Ralf Rangnick chuan Bundesliga club zawm a tum loh thu a sawi chian tak avangin Arsenal manager hlui lamah hian an mit a fu zui ta a ni.

Marcel Desailly chuan, “Arsene Wenger hi manager ni chi a ni tawh lo, a tih tawh loh tawp tur thil a ni,” a ti.

“A thiamna te, a finna te hi hmang tangkaiin club dinhmun tla hniam mek hi a tiziaawm thei chiang dawn a. First team leh academy vel chawisan kawngah pawh a thawh hlawk thei viau ang tih chu a rinawm a. Hetih rual hian manager atan chuan a ruat chi tawhin ka ring lo. Tunah kum 70 zeta upa a ni tawh a, a upa tawh mah mah a ni,” a ti bawk.

Bayern Munich chuan Wenger hi tun season tawp thleng an club enkawl tir an hreh lo niin an sawi a. Arsenal boss hlui hi Bayern Munich chief executive Karl-Heinz Rummenigge nen an inbe dawn hnai niin sawi a awm bawk a ni.

German club lian hian Ajax manager Erik ten Hag chu an be phawt a, a club enkawl lai kalsan a tum loh thu a sawi hnuah Paris Saint-Germain coach Thomas Tuchel an beisei leh bawk a. Tuchel hian Paris khawpuia awm zui a tum thu a lo sawi hnuah Red Bull Salzburg head of sport and development Ralf Rangnick an be leh a, a lo hnawl leh takah chuan Arsenal manager hlui hi an beisei ve leh ta a ni.

Arsene Wenger chuan 2018 ah khan kum 22 zet a lo enkawl tawh Arsenal chu a chhuahsan a. German tawng chu nal takin a hmang thei a, player lar tak tak enkawl kawngah pawh tawn hriat a nei tha tawh hle a. Bayern Munich ah hian Arsenal winger hlui Serge Gnabry pawh a awm mek a ni.

Season kal mek tawp thlengin Bayern Munich chuan Wenger hi chhawr an rilruk mek a, hemi hnuah hian Erik ten Hag emaw, Thomas Tuchel emaw chu biak that leh an rilruk tel a ni.