Boxing khawvel nghahhlelh Canelo Alvarez leh Daniel Jacobs inhnek chu zawhfel a ni leh ta a. Las Vegas, USA-a mipui pungkhawm tam tak zingah Canelo Alvarez chuan unanimous decision-in Daniel Jacobs a hneh a, heti hian WBC, WBO leh IBF Middleweight Champion thar a ni ta chiah a ni.

Compubox atang chuan Alvarez-a hian power punch vawi 120 lai a hnek chhuak a, a tumpui Daniel Jacobs erawh chuan vawi 89 a hnek chhuak thung.

Alvarez (52-1-2, 35 KOs) hian a hnek chhuah zingah 45 percent a hnek fuh thung a, judge te mithmuhah 115-113, 115-113 leh 116-112 hmanga chak zawka puan a ni a, CBS scorecard erawh chuan 114-114 angin a inhnehtawk tir thung.

Alvarez-a chuan, " Kan beisei ang ngeiin a hautak dawn tih ka hria a, ka chak theih chhan hi Pathian vang liau liau a ni, " a ti. An inhnek chhung hian na taka inhnek fuh a awm meuh lova, boxer te hi an fimkhur dun hle a, an kutthlak a na dun bawk a, chetsual palh an hlauh em avang pawhin a ni mahna.

An insual zawhah Jacobs-a chuan, " Kan inhnekna video en let leh ngei ka duh dawn a. Alvarez-a hi boxer tha tak a ni a, champion ropui tak a ni, " a ti bawk.

Jacobs (35-3, 29 KOs) hian a hnek chhuah zawng zawng atangin 25 percent a hnek fuh a, a chang phei chuan a nawr leh thin viau a, jab pawh a hmang nasa hle a, Alvarez erawh a insiamrem thiam nasa si a, duh ang ngawtin a che theilo thung.

Round tam zawkah chuan an inhnehtawk hle a, an thiamna a sang dun bawk a, dun ang ngawta chiang taka inhnek fuh a tam thei meuhlo a ni ber. Round 8 naah boruak a sang viau a, Jacobs-an a rualin a hnek deuh pawp pawp a, Alvarez erawh tawnhriat a ngah tawh bawk a, chhana tha tawk tak a pe leh thin. Hetah zet chuan Jacobs a phur chho, min hnek rawh ti niawm takin a cho zui, na tak takin boxer te hi an inhnek zui mawp mawp.

Round 9 naah erawh Jacobs a che tha chho, chiang zetin Alvarez a hnek fuh a, boxer rothap Alvarez erawh a tlawm duhlo nasa a, round 10 atang chuan a insiamrem chho leh thei.

An inhnek zawha an kawmnaah Canelo chuan, "Round 9 kha chuan min hnek fuh chiang a, na tak pawh a ni. Mahse fighter tha chu an tlawm mai mai ngailo, " a ti thung. Golovkin leh Canelo inhnek a awm leh dawn em tih zawhna chu chhangin, "Golovkin hnek leh kher hi a tulna a awmlo. Mipuiin an hmuh chak anih chuan ka hneh nawn leh mai ang, " a ti.

Golden Boy Promoter De la Hoya chuan, " Canelo leh Jacobs an intum leh ngei ka beisei a, zanin pawh khan an inhnehtawk viau a. Mipui pawhin an hmuh leh ngei ka beisei, " a ti bawk.