27 Jul 2020 08:21

inkhel

WBC Title Match-a tel tur NT Biakkima

NT Lalbiakkima chu Seoul khawpuia WBC Asia Title Match an buatsaih turah tel tura tih chian a ni tawh a, light flyweight huangah Mizo boxer tha hi inhnek tura ruahman a ni.

Korea Boxing Organization chuan kumin September 18 ah khian Seoul khawpuiah WBC Asia Title Match buatsaih an tum a. Tun dinhmunah chuan light flyweight bakah featherweight leh heavyweight ah te inhnek tur an ruat fel tawh a ni.

Lalbiakkima chu light flyweight huangah inhnek tura ruahman niin, a khingpui tur hi tih fel a la ni chiah lo a. Featherweight huangah hian Korean boxer Dong Kwan Lee leh Indian boxer Amandeep Singh te chu inhnek tura ruahman an ni a, heavyweight huangah chuan Korean boxer Jung Kook Kim leh Indian boxer Ranjeet Singh te chu inhnek tura ruahman an ni.

Star Promotion in WBC Title Match buatsaih an tumah hian international medal bakah senior national gold medal te pawh lo la tawh Biakkima hi tel tura thlan nghal a ni.

Biakkima hmachhawn tur hi an tifel nghal mai lo a, WBC chuan Thailand boxer leh USA boxer an thlang phawt a. Heng boxer pahnih hi an record pawh a tha viau mai a, USA hi vawi 26 inhnekah vawi 24 a chak a, vawi 2 chak loh neiin, mi 21 chu a knockout a. Thailand boxer hi vawi 14 inhnekah a chak vek a, a khingpuite a la knockout vek bawk a ni.

Thailand boxer leh USA boxer hi an record a tha deuh bawk a, promoter lampang chuan Biakkima tan an huphurhpui deuh a, hei vang hian Chinese boxer pawh an ngaihtuahnaah hian an dah tel tho a. China ram boxer hi vawi 8 a inhnek tawhah vawi 6 chakin, vawi 2 chu a chak lo tawh a ni.

He WBC Title Match nei tur hian ruahmanna siam vek mah se coronavirus vanga thulh theih erawh a la ni reng a. An tih tlang theih tho avangin Biakkima chuan tun atanga a inpuahchah tan thu a sawi.

“Duh angin experience te ka la nei tha lo a, chu vangin vawi khatnaa professional round 10 han khelh nghal tawp chu a ruk chuan ka huphurh ve deuh a. Round 6 vel chu ni se pawi ka ti lo a, round 10 han inhnek nghal tawp mai kha chu tlem chuan a zuamawm lo ve deuh a ni,” tiin Biakkima hian inkhel.com a hrilh.

“He thil hi chiang deuh reuh, chiang chiah si lo a la ni a, hei vang hian inrin thiam pawh a harsa rih hle a. Sparring partner pawh tunah hian min la pe lo a, chutih rualin ka theih anga thain ka inbuatsaih chho ve mek a. He title match hi kan nei dawn ta a nih pawha inpeih thlap ka duh a ni,” tiin a sawi a ni.