Watford leh Arsenal an inhnehtawk

16th September 2019, 04:09AM

Watford leh Arsenal te chu Vicarage Road-ah an inkhel a, team pahnihte hian goal hnih ve ve an thun a, chak zawk an awm lo.

Inkhelh hma boruak
Mual neitu Watford chuan manager Javi Gracia an ban hnua an game hmasa ber an khel dawn a, Quique Sanchez Flores chuan an team chu a enkawl a, a hmabak a hautak hmel hle.

Gunners chu Hornets nen Premier League game an khelh hnuhnun pathumah an la chak vek a, hei vang hian tun tuma an inkhelah pawh hian chak theih ngei an inbeisei hle a. Watford hi season liam taah khan Premier League bikah chuan Arsenal laka goal thun thei lo awm chhun an ni.

Quique Sanchez Flores chuan Javi Gracia first XI ah pathum a thlak danglam a, Jose Holebas, Etienne Capoue leh Gerard Deulofeu te chu bul a tantir a. Arsenal lamah Alexandre Lacazette chu a chhawr theih loh a, Mesut Ozil chu tun season-a a vawi khatna atan a inlan ve bawk a ni.

Watford (4-2-3-1): Ben Foster; Jose Holebas, Craig Dawson, Christian Kabasele, Kiko Femenia; Etienne Capoue, Abdouaye Doucoure; Gerard Deulofeu, Tom Cleverley, Will Hughes; Andre Gray

Subs: Heurelho Gomez, Daryl Janmaat, Adrian Mariappa, Nathaniel Chalobah, Ismaila Sarr, Dimitri Foulquier, Roberto Pereyra

Arsenal (4-3-3): Bernd Leno; Sead Kolasinac, David Luiz, Sokratis, Ainsley Maitland-Niles; Granit Xhaka, Matteo Guendouzi, Dani Ceballos; Mesut Ozil, Pierre-Emerick Aubameyang, Nicolas Pepe

Subs: Emiliano Martinez, Calum Chambers, Lucas Torreira, Joe Willock, Reiss Nelson, Gabriel Martinelli, Bukayo Saka

Inkhel an tan phat atangin Arsenal chu an chungnung nghal zawk a, inkhel an thunun a, ball pawh an chang hnem zawk daih a. Heti chung hian Watford pawhin an nawr phei ve deuh fo bawk a, goal thunna hun tha erawh an nei thei mai lo ve ve a ni.

Minute 21-ah goal hmasa ber a lut a. Arsenal chuan mual laihawl velah ball an chang a, Sead Kolasinac chuan Watford goal lamah ball chu a tlanpui a, a hnuah Pierre-Emerick Aubameyang chu a pe a. Penalty area vela awm Aubameyang chuan ball chu dawngin, rang zetin a vir a, goal chhungah chuan a pet lut a, Arsenal chu hma a hruaipui a ni.

February 2018 atang khan Aubameyang hi Premier League goal 45 zetah a inhnamhnawih tawh a, goal 36 a thun tawh bakah mi goal thun tur vawi 9 a siamsak tawh a. Goal-a inhnamhnawih hnem lamah hian Mohamed Salah (53) chiah tluk loh a nei a ni.

An innawr chho leh a, minute 32-ah goal dang a lut leh a. Mesut Ozil chuan Ainsley Maitland-Niles chu ball a pe a, Maitland-Niles hian Pierre-Emerick Aubameyang chu ball hi a pe ve leh chhawng a. Aubameyang chuan awlsam deuhin Watford goal-ah chuan a lo thun a, 2-0 in hma an hruai ta a ni.

Watford chuan goal thun ngei tumin an nawr ve thin a, mahse an tum ang hi an puitlin thei mai lo thung a. Half time thlengin goal dang a luh belh tawh lo a, Arsenal chuan chawlhlawk thlengin 2-0 in hma an la hruai chhunzawm zel a ni.

Second half an khel chho leh a, Arsenal chu an game a buai angreng hle a, Watford chuan an khel tha ve tial tial thung a. Hornets hi an khelmuala Arsenal an lo mikhual hnuhnun vawi 6 ah vawi 5 chu an tlawm tawh a, tun tumah hi chuan chak theih ngei an duh hle.

Minute 53-ah mual neitute tan lawmna hun a inher chhuak ve hlauh mai a. Arsenal chuan goal kick-ah an fimkhur loh rah an seng a, Sokratis chuan ball pet chhuak tha mai loin Guendouzi chu pek a tum a, hei hi Gerard Deulofeu chuan a lo khawih peng a. Ball chu Tom Cleverley chuan Arsenal goal-ah a thun a, an si phurh pakhat chu a sut theih phah a ni.

Goal khat an thun hnu hian Watford chu an harh thar a ni ber a, goal dang thun belh ngei tumin beihpui an thlak chhunzawm a, hun tha pawh an nei chho nual a, goal erawh an thun thei mai lo thung.

Minute 79-ah Roberto Pereyra chu Arsenal box chhungah David Luiz chuan a titlu a, referee chuan Watford chu penalty a hlawhtir a. Pereyra chuan penalty hi petin hemi hmang hian an si phurh pakhat zawk chu a sut ve leh a, 2-2 a nih theih phah chiah a ni.

An khel rei tial tial a, Watford chu an langsar telh telh bawk a, inkhel pawh an thunun chho deuh mah tawh zawk a. Goal thun theihna hun tha an insiam hnem zawk a, an tum ber erawh an tihlawhtling thei meuh lo thung.

Hun tawp dawnah Watford chuan chak theihna hun tha zet mai an nei a, Abdouaye Doucoure ball pet chu Bernd Leno chuan a lo dang hlauh mai a, goal dang a awm belh loh phah hlauh a. Hemi hnuah hian hun a tawp a, 2-2 in an inhnehtawk ta a ni.

Copyright © inkhel.com 2024. All rights reserved.