Premier League inkhelah Arsenal chuan Vicarage Road-ah Watford an luhkhunga, Arsenal hi si khat faia chakin point thum pawimawh tak an hlawhchhuak.
Goal awmchhun khungtu hi Arsenal striker Pierre-Emerick Aubameyang a ni a, Aubameyang-a’n goal a khung hnu lawk hian Watford captain Troy Deeney chu hnawhchhuah a ni.
Khelh 33 atangin Arsenal hian point 66 an hlawhchhuak tawh a, Chelsea lehpelin palinaah an chho va, khelh khata khel tlem zawk chungin Arsenal hi Chelsea an point hmuh zat a inang a, Gunners hi an goal difference a tam zawk avangin palinaah an awm a ni.
Watford 0-1 Arsenal
(Aubameyang 10’)
Red Card: Deeney (Watford)
PLAYER RATINGS
Watford: Foster 4, Janmaat 6, Cathcart 6, Kabasele 7, Masina 6, Femenia 7, Doucoure 8, Capoue 7, Hughes 7, Gray 6, Deeney 2..subs: Success 6, Sema 5.
Arsenal: Leno 7, Mustafi 4, Koscielny 6, Mavropanos 5, Monreal 7, Torreira 6, Xhaka 6, Mkhitaryan 5, Ramsey 6, Iwobi 5, Aubameyang 6..subs: Ozil 6, Maitland-Niles 7, Guendouzi 6.
Match Report
Mual neitu lam Watford hian 4-3-1-2 formation an hmanga, Manchester United goalkeeper hlui Ben Foster chuan si ban a nghak. Defence-ah Janmaat, Kabasele, Cathcart leh Masina dah niin, midfield-ah Femenia, Capoue leh Doucoure-te an awm bawk. Hmatawngah Deeney leh Gray-te inkawpin an hnung chiahah Hughes dah a ni.
Arsenal in 4-2-3-1 formation an hmanga, Bernd Leno chuan si ban nghakin tlar hnungah Mustafi, Mavropanos, Laurent Koscielny leh Nacho Monreal –te an intlar. Defence hma chiahah Granit Xhaka leh Lucas Torreira-te awmin, hmatawngah goal khungtu Aubameyang maltlat tir a ni a, a hnung chiahah Aaron Ramsey awmin, a sirah Mkhitaryan leh Alex Iwobi-te an tlan thung.
Mual neitu lam Watford in bul an tan tha angrenga, inkhel tan tirah Gray chuan chance a nei nghala, corner atangin Watford an hlauhawm nghal teuh hle. Mahse minute sawm khelh a nihin mikhual Arsenal-in hma an hruai a, Foster-a chet muan chhawr tangkaiin Gabonese striker Aubameyang chuan inkhela goal awmchhun a khunga, Arsenal in an chakpui.
Aubameyang-a’n goal a khung hnu lawkah Watford captain Deeney hnawhchhuah a ni nghala, Lucas Torreira nen ball an inchuhna lamah Deeney hian Arsenal midfielder hi a kiu in a hmaiah a nghawka, referee chuan yellow card pawh pe hmasa lovin Deeney hi a hnawtchhuak nghala, inkhel pumpui deuh thaw chu Watford hian player 10 in an khel.
Minute sawmhnih naah Cathcart-a ball pet tha tak chuan Arsenal si ban nghaktu Leno chuan tha zetin a lo save. Hemi hnu lawk hian Watford-in Arsenal na nawr a, mahse hlauhawma a chhuah hma in Monreal a inrawlh hman.
Darkar chanve khelh a nih hma deuhin Arsenal player Iwobi chuan chance tha a neih a hlah ve ve a, Watford tan Foster a che tha leh. Darkar chanve chuang hret khelh a nihin Watford lamin freekcik an hmu a, Capoue chuan freekick hi a la a, Arsenal goal-ah nalh takin ball chuih mahse tha em em in Leno chuan a lo save.
Second half-ah Arsenal an hlauhawm zui leh, darkar khat vel khelh a nih hma deuhin Iwobi chuan Kabasele paltlangin ball a tlanpuia, Iwobi hian changtu neilo Mkhitaryan ball pe in, Foster chuan a lo save tha leh hle. Hemi hnu lawk hian Watford-in goal an khung teuh em em a, yard 35 vel laia hla atangin Masina chuan Arsenal goal bar a pet per dawta, goal se chu tun season-a goal mawi ber zingah a tel ngei ang.
Darkar khat chuang khelh a nih atangin Arsenal an khel chhe deuha, an mawng a pawp thin viau a, team tha tak tum se chua goal hnih tal an chhauh a rinawm. Mahse Arsenal lam pawhin chance an ngah a, Watford nawrin half chance an insiam deuh reng.
80mins khelh a nih hma deuh lawkin Xhaka shot chu Foster chuan a save leh a, Watford lamin chance nei zui ve nghalin Gray-a goal khung tur chu Maitland-Niles chuan a lo dang hman. 83mins chhovah Janmaat atanga cross ball lokal chu Hughes chuan Arsenal goal lamah lo tauh mahse goal a zawn lo.
Arsenal hi khual mualah si khat faiin an chak zui a, tun Premier League season kal mekah a vawi khat nan an mikhualnaah goal an chhuah lo. Arsenal leh Watford –te hi Premier League-ah vawi 12 an inhmachhawn tawh a, vawi khat mah an la inhnehtawk ngai lo a ni.