Premier League-a team thar tur Watford chuan Udinese atangin season hnih chhung loan-a an hawh tawh Matej Vydra chu a nghetin an lalut a, kum nga daih contract an ziahpui.

Kum 22 mi hian tunhnaia season thum chhung chu England-ah loan-in hun a hmang a, season hnih chu Watford-ah hian niin West Brom-ah pawh a khel tawh thin bawk.

Czech Republic international striker hian season liamta khan Watford tan goal 16 a khung a, season thara Premier League khel turin a kaipui.

Watford-a a season hmasa zawkah pawh goal 20 a khung a, kum 2013 khan Championship Player of the Year-ah thlan a ni.