NBA Western Conference Finals game hmasa berah Golden State Warriors chuan Houston Rockets an hneh a, seven match series-ah hma an hruai.

Kevin Durant chuan point 37 a score a, Warriors chu Rockets lakah 119-106 in a chakpui a. Warriors hian a tir lamah chuan an um zawk a, a chang chuan point 9 ngawt tein an hnufual a, mahse half time velah chuan nihrual ve hman a. Fourth quarter-ah hma an hruai chho ve tan a, a tawp thlengin a chungnung zawkah an tang tluan ta a ni.

James Harden chuan point 41 zet a score a, mahse tun season chhunga anmahni muala an vawi hnih tlawmna chu an tawng tho a.

Stephen Curry chuan Western Conference second seed Warriors tan point 18 a thun a. Golden State Warriors hi a zawnin vawi 4 chu conference finals-ah an lut ta a, 2014 hnulamah Oracle Arena pawnlama game tir ber an khelh leh hmasak ber a ni a, 2014 khan Los Angeles Clippers court-ah 4-3 in an tlawm a ni.

Houston hian Durant an veng hneh lo hle a, hei ringawt pawh buaina tham a nih tawh laiin 3rd quarter-ah minute 10 vel a la awm tihin Trevor Ariza chuan vawi 5 a foul zui a. 4th quarter an khelh chhoh hnuah phei chuan Rockets hi a umtu an ni chho deuh ngar ngar a, a tawp thlengin an lehthal thei ta lo a ni.

A hmain Eastern Conference finals-ah Boston Celtics chuan Cleveland Cavaliers chu 108-83 in an hneh a ni.