11 Jun 2016 07:14

Inkhel

Mizo Sports Website hmasa ber

​Warriors-in champion an hnaih zel : Warriors 108-97 Cavaliers (Game 4)

Tukin khan The Q Arena-ah NBA final game 4 khelh a ni a, Game 3-ah Golden State Warriors chu chak zo lo mahse Game 4-ah 108-97 in Cleveland Cavaliers lakah hnehna an chang a. Series-ah 3-1 in Warriors hian hma an hruai mek.

Warriors leh Curry dik tak kan hmu leh ta kan ti thei ang. Curry-a'n MVP a nihzia lantirin point 38 lai a nei thei a ni. James leh Cleveland Cavaliers an thochhuak leh thei ang em? Final game series a 3-1-a an chak loh hnuah eng team mah an come back leh tawh lo a ni.

Game 3-na thlengin Curry a che hleithei lo. Curry hian final game hmasa pathumah point 48 chiah a score a, sawiselna nasa tak a tawk, LeBron James chuan final chanchinthar a luah. Mahse tukinah erawh Stephen Curry a langsar hle a. Curry hian points 38 a score bakah assist vawi 6 lai a nei a. Klay Thompson pawhin 25 a score tling nghe nghe.(www.inkhel.com) Cleveland Cavaliers innghahna LeBron James chuan 25 points a score bawk.

Curry a rawn che tha chho leh hi Warriors chuan mak an ti lem lo. "Stephen Curry a ni alawm, MVP a ni a, tharum taka khel turin a pumruain a phak lo. Mahse a thiamna hmangin inkhel a thunun ta zawk a ni. Hei hi thil awlai tak a ni lo, a chang chuan kan shot hi a lut lo fo, mahse zanin erawh a lut teuh ta a ni," tiin Warriors coach Steve Kerr chuan a sawi.

Curry chuan inkhelh zawhah, "Mipui zawhna chu kan chhang ta a ni. Kan nihphung pangngai kan rawn lantir chho leh ta e." tiin a sawi nghe nghe a ni. (www.inkhel.com)

Regular season-a vawi 73 lai hnehna changa record thar siam Golden State hian a zawna NBA champion nih theihna chance tha tak an nei mek a, kumin hian an champion a nih chuan a zawna champion thei team 7-na an ni dawn a ni.

Nikum NBA final-ah khan Western Conference champion (www.inkhel.com) Golden State hian Eastern Conference champion Celveland Cavaliers 4-2 in an hneh a. Kumin hian nikum final ang chiah kha a ni leh chho dawn niin a lang. Game khat an khel leh anga, hetah hian Warriors an chak a nih chuan an champion tawh mai dawn a ni.

Pictures credit : nba.com