Stephen Curry chuan NBA khawvela a hun hmanna ber Golden State Warriors chu chhuahsan a tum loh thu sawiin, a inkhelh theih chhung chu Warrior nih a duh thu a sawi.

Tun kar khan The Bill Simmons Podcast-ah Stephen Curry hi an kawm a, a dam chhunga Warrior nih a duh leh duh loh an zawhna chu chhangin, “Duh tehreng mai. Hei hi ka hmun nghet a ni a, helaia awm reng hi ka duh a. A chhan hrang hrang avangin helai hmun chhuahsan loh hi ka duhthusam a ni,” a ti.

Vawi hnih MVP atana an lo thlan tawh Curry hian tun hnai kum li kalta chhung khan NBA title pathum a la a, All-Stars ah vawi thum telin Golden State ah hian kum nga chhung atan $201 million contract a ziak bawk a, 2021-22 thleng Warrior a la ni dawn a ni.

An kawmnaah hian Stephen Curry chu thil chi hrang hrang an zawt kual a, a khelhpui tawh zingah chuan LeBron James chu player tha ber nia a ngaih thu sawiin, Joel Embiid pawh zahpuiawm lo berte zinga mi niin a sawi bawk.

Kum 30-a upa Curry hian hun rei tak chhung NBA khelh zel a duh thu sawiin, Jason Kidd chu a entawn chhoh thu a sawi a. Jason Kidd-a’n a kum a tam chhoh hnua a taksa mil tawka khelh dan a thiam ang bawk khan tih ve a rilruk thu Curry hian a sawi a ni.