06 Jun 2020 04:41

inkhel

Vun rawng vanga hmuhsitna ka tawk hnem: Hamilton

Lewis Hamilton chuan vun rawng vanga hmuhsitna leh tihduhdahna a tawh hnem thin thu a sawi.

Vawi ruk ngawt Formula One world champion ni thei Lewis Hamilton chuan a naupan laiin a vun rawng vangin miin an hmuhsit fo thu sawiin, a chang chuan tihduhdahna te pawh a tawk thin tih a sawi chhuak.

Hamilton hian hetianga vun rawng vanga hmuhsitna leh tihduhdahna a tawh hnem tak hnuah hian a lo inven ve theihna turin karate a zir phah niin a sawi a, khatiang hun lai kha a ngaihtuah let chang chuan a rilru a la na fo thin niin a sawi a ni.

Tun kar tih lamah khan Hamilton chuan America rama George Floyd tihhlum duh loh lantirna a thlawp thu a sawi chhuak a. Hetih rual hian F1 driver dangte’n hemi chungchanga tawngkam an neih ve loh avangin a lungawi loh thu a sawi chhuak bawk a ni.

“Tunlaiin vun rawng vanga inhmuhsitna leh tihduhdahna te, inthliar hranna te a hluar chho hle a, tun hnaia thil thleng duh lohna pawh an lantir mek bawk a. Hetiang thil hian ka naupan laia ka thil tawh thinte min hriat chhuahtir a ni,” tiin Hamilton chuan a sawi.

“Ka naupan laia chona ka tawn fo te, tihduhdahna leh hmuhsitna te kha theihnghilh harsa ka ti a, keimah ang bawka hmuhsitna leh tihduhdahna tawk hi tam tak in awm ve ngei pawh ka ring tlat a ni,” a ti bawk.

A sawi zelnaah, “Ka thil lo tawn tawhte hi sawi ka chhuak ngai lo hle a, phuba la loa hmangaihna nen chhang let tura zirtir ka ni a, intlansiaknaah hnehna puan zel mai hi ka tih dan a ni,” a ti.

“Khatiang taka hmuhsitna leh tihduhdahna hmachhawn thei tur khan a hnuah karate ka zir phah ta ringawt mai a. Heti chung hian rilru lama nghawng a neih kha chu a dan theih tak tak loh a ni,” tiin a sawi a ni.