Virat Kohli chuan November 5, 2019 hian kum 31 a tling ve ta a, India cricket team captain hi khawvela batsman zingah chuan a ropui ber pawla sawi a ni mek a, ODI batsmen zingah chuan No. 1 a ni mek a ni.
Kohli hi India Test captain zingah chuan ram chhung leh pawnah pawh a hlawhtling ber a ni a. Tun hnaiah khan Kohli chuan India chu South Africa nen three-match Test series an khelhah 3-0 ngawtin a chakpui a. A kaihhruaina hnuaiah India chu ICC World Test Championship 2019-21 point table-ah pawh a chungnung ber an ni mek a, point 240 an hmu mek a ni.
A piancham pual hian Virat Kohli chanchin thenkhat langsar zual han tarlang ila.
1. Virat Kohli kaihhruai U-19 team chu 2008 World Cup-ah an champion.
2. Virat Kohli hi cricketer zingah chuan mahni team te Deodhar Trophy final thlenpui thei naupang ber dawttu niin, 2009-10 season-ah khan North Zone chu final a luhpui a, kum 21 leh ni 124 a upa a ni.
3. Kum 10 chhunga international run 20,000 siam thei hmasa ber niin, kum 31-a upa Kohli hian kumin kum tir lama West Indies tour-ah khan hetiang zat run hi a siam tling a. ODI an khelhah Indian skipper hian ball 99 ah run 114 a vaw chhuak a ni.
4. India captain hi batsman zingah chuan ODI run 10,000 siam tling hmasa ber a ni a, 2018 kumah khan West Indies lakah run 157 a siam a, run 10,000 chu a vaw tling a. Hetiang zat run siam tur hian Kohli chuan inning 205 a mamawh a, Sachin Tendulkar khan run 10,000 siam turin inning 259 zet a mamawh a ni.
5. Kum khat chhunga run 1000 siam rang ber niin, inning 11 lekah Kohli hian ODI run 1000 hi a siam tling hman a. A hmaa record siamtu Hashim Amla khan ODI run 1000 siam tling turin inning 15 a duh a ni.
6. Kohli hi cricketer zingah chuan kum khat chhunga ICC mi mal chawimawina la vek thei awm chhun a la ni a. 2018 ah khan a che tha bawk a, Kohli chuan Sir Garfield Sobers Trophy, ICC Test leh ODI Player of the Year chawimawina te a dawng a ni.
7. Khingpui pahnih lakah a zawna century vawi 3 siam thei awm chhun a la ni a. Virat Kohli hian February 2012 leh July 2012 inkarah Sri Lanka lakah run 133*, run 108 leh run 106 te a siam a. 2018 kumah West Indies lakah run 140, 157* leh 107 te a siam bawk a ni.
8. Captain ni chunga kum khat chhunga run siam hnem ber niin, 2017 kumah khan right-handed batsman hian run 1460 zet a siam a. A hmaa Australian batsman Ricky Ponting record siam, 2007 kuma run 1424 a siam chu a khum thei a ni.
9. World Cup 2019 semi final-ah tla mah se Virat Kohli chu captain zingah event khata a zawna vawi 5 ngawt run 50 siam thei hmasa ber niin, Australia, Pakistan, Afghanistan leh West Indies te lakah run 82, 77, 67 leh 72 te a siam a ni.
10. Virat Kohli hi Test captain leh Indian player zingah chuan kum thum chhung a zawna run 1000 chuang vaw tling thei hmasa ber niin, 2016 ah run 1215, 2017 ah run 1059 leh 2018 ah run 1322 te a siam a ni.
11. Kohli hi Test captain zingah chuan double century siam hnem thei ber a ni.
12. 2016 kumah khan run 973 a siam a, IPL season khata mi mal run siam hnem thei ber a ni.