​Villa Park-ah United an chak

10th July 2020, 08:07AM

Premier League inkhelah Manchester United chuan Villa Park-ah Aston Villa an luhkhunga, United hian si thum faiin hnehna an chang.

United tan hian Bruno Fernandes, Mason Greenwood leh Paul Pogba te chuan goal khat theuh an khunga, point thum pawimawh tak an hlawhchhuak.

Khelh 34-ah United hian point 58 hlawhchhuak tawhin, panganaah an awm zela, point khatin palinaa awm Leicester City an pha lo. Villa hi an dinhmun a tha lo hle a, khelh 34-ah point 27 hlawhchhuak tawhin, 19-naah an awm meka, 18-naa awm Bournemouth chu point khatin an pha lo.

Villa lam hian bul an tan chhe lova, an khel pawh a tha thawkhat viaua, darkar chanve khelh a nih hma in Trezeguet chuan midfield-ah ball a chhuhsaka, United goal lamah ball khalh pheiin, si ban a pet per.

Trezeguet-a’n si ban a pet per hnu lawk hian United-in penalty awm ang lo tak an hlawhchhuak zuia, Fernandes chuan penalty box chhung velah chiah a Zidane spin pahin a mah chuh tura rawn kal Konsa a rapa, player pahnihte hi an tlu; referee Jon Moss chuan United lam hi penalty a pe a, VAR lamah check niin penalty hi kal tlang tir a ni.

Penalty atang hian Fernandes chuan chiang takin United hmahruaina goal a khung zuia, Villa hian penalty an chawi dan hi na an tih hle a rinawm. Jon Moss-a’n Konsa raptu zawk Fernandes te penalty a pe hi a mak angreng hle a, half-time laiin Premier League-a kum 10 chuang zet lo referee tawh thin Dermont Gallager pawhin penalty tur a nih loh thu a sawi nghe nghe.

United hian tun season-ah vawi 13 ngawt penalty an hlawhchhuak tawha, season khat chhunga Premier League a penalty hmu hnember zingah an tel ve ta chiaha, Crystal Palace leh Leicester City te record an rawn nih rual ta a ni.

Half time hma chiahin United hian goal dang an khunga, Greenwood chuan mawi em em in, box pawn atangin goal-ah ball a chhuih lut. Villa hi sawi tawh angin an khel chhe lo viaua, mahse awm ang lo taka penalty an hlawhchhuah hnuah an game-in a tuar a tih theih awm e.

United an khel tha tulh tulha, an khel pawh a hmuhnawm hle a, darkar khat khelh a nih hma chiahin an goal thumna an khung; United hian corner hlawhchhuakin, corner atang hian Fernandes chuan Pogba ball a pe a, Pogba hi shoot tura insiamremin, goal-ah ball a shoot-a, a goal mawi hle a, si thum faiin United hian hnehna an chang ta a ni.

Aston Villa 0-3 Manchester United

(Fernandes 27’ pen, Greenwood 45+5’, Pogba 58’)

Player Ratings

Aston Villa: Reina 6, Konsa 6, Hause 5, Mings 5, Taylor 5, Douglas Luiz 6, McGinn 5, Grealish 5, El Ghazi 5, Samatta 5, Trezeguet 5. Subs: Davis 6, Nakamba 6, Hourihane 6, Vassilev 6.

Manchester United: De Gea 6, Wan-Bissaka 5, Lindelof 6, Maguire 6, Shaw 7, Matic 5, Pogba 7, Fernandes 7, Greenwood 8, Martial 7, Rahford 6. Subs: Williams 6, McTominay 6, Fred 6, James 7, Ighalo 6.

Copyright © inkhel.com 2024. All rights reserved.