Aston Villa chuan kum li chhung an kawl tawh Darren Bent an chhuahtir (release).

Kum 31 mi Bent hian January thla khan season tawp thleng atan loan-in Derby County a zawm a, Championship-ah game 15 khelin goal 10 a khung.

Season liamtaah khan Villa tan hian game ruk chauh a khel phak a, nikum November thla khan thla khat chhung atan loan-in Brighton & Hove Albion a zawm tawh bawk a he club tan hian game nga khelin goal hnih a khung.

Ipswich Town atanga in zirchhuak Bent hian Premier League-ah goal 106 a khung tawh a, a khelhna club chetha thin lo mahse striker goal khung thei a ni.

Kum 2005 June thla khan Ipswich atangin Charlton Athletic-in an lalut a, kum 2007 June thla thleng a khel a hemi hnu hian Tottenham Hotspur-in an lalut veleh.

Spurs tan hian league-ah game 60 khelin goal 18 a khung a, kum 2009 July thla khan Sunderland-in an lalut veleh a Black Cats-ah hian kum 2011 thleng a khel.

Aston Villa-in kum 2011 January thla khan kum li leh a chanve daih contract ziahpuiin an lalut a, Villa tan hian a game hmasa berah goal khung nghalin Manchester City 1-0 in an hneh.

Villa-a a awm chhung hian loan-in Fulham, Brighton & Hove Albion leh Derby-ahte a khel kual hman bawk a ni.

Bent hian kum 2006 leh 2011 inkar khan England tan game 13 khelin goal 4 a khung a, ram tan hian inkhelh a chawlhsan thu la puang lo mahse a khelh leh chu a rinawm tawh loh.