Stoke City chuan an goalkeeper Asmir Begovic lakluh tuma Aston Villa dawrna an hnawlsak niin Sky Sports chuan an tarlang.

Bosnian goalkeeper hi Chelsea pawhin lakluh an duh a, Petr Cech a chhuak dawn si a London club hian Thibaut Courtois thla vengah an duh niin sawi a awm.

Kum 27 mi Begovic hian kum khat daih chauh The Potters tan hian contract a nei tawh a, a hmalam hun hi an manager Mark Hughes leh chief executive Tony Scholes a sawipui ang a inremna dang pawh an siam zawk maithei.

Birmingham Mail-in an tarlan dan chuan Stoke hian £10m-in Villa hi an zawrh a, mahse Tim Sherwood enkawl mek Villa hian heti zat hi sen an tum lo va sum thehchhuak ve thungin hnawlsak an ni.

Begovic hian kum 2010 khan Portsmouth atangin Stoke hi a zawm a, a chhuak anih chuan Stoke hian rinrawlah England Under-21 goalkeeper Jack Butland an hmang ang a, an chhuahtir lo anih chuan Butland hi loan-a chhuah an phalsak dawn niin tarlan a ni.

Bosnia-Herzegovina international goalkeeper hian Villa a pan chuan USA international goalkeeper Brad Guzan nen khelhna hmun inchuhin an inel dawn a, a hautak viauin a rinawm.

Potters tan Begovic hian game 160 chuang a khel tawh a, Bosnia national team tan pawh game 41 a khel tawh bawk.

Yugoslavia keh darh hma khan Begovic hi a piang a, kum sawm mi anihin Canada-ah an pem a Canada Under-20 tan pawh khel hmanin senior team-ah chuan Bosnia tan a khelzui ta zawk a ni.

German club FC Kirchhausen atangin bul a tan chhova, kum 2005 khan Portsmouth-ah a lut a Yeovil, Bournemouth leh Ipswich-ahte pawh loan-in a khel tawh a kum 2010 khan Stoke City hian an lalut.