12 Aug 2019 10:11

inkhel

Viking FK a trial nei nawn tur Lallianzuala Chhangte

Lallianzuala Chhangte chuan a hmaa trial a lo neih tawhna Viking FK lam a pan leh tawh a, a vawi hnihna atan trial a nei leh dawn a ni.

Mizo tlangval Lallianzuala Chhangte hian kumin kum tir lamah khan Norwegian club Viking FK ah trial hi a lo nei tawh a. Trial hi a nei tan dawn chauh a, Delhi Dynamos chuan an ko kir leh thut a, ruahman angin hun a hmang tluanchhuak ta lo.

Viking FK manager Bjarne Berntsen chuan a vawi hnihna atan Lallianzuala hi an club-a trial nei turin a ko nawn leh a, chanchin buatsaih lai hian Lallianzuala hian Norway a pan mek a. Norway a thlen hnu deuhah trial hi nei nghal mai tura ruahman niin, Mizo tlangval hi a che fuh a nih chuan contract an ziahpui zui thei dawn a ni.

Kum 23-a upa Lallianzuala hian ni sarih chhung chu trial hi a nei dawn a, manager Bjarne Berntsen mit a tlung a nih chuan Norwegian club-ah hian contract a ziak thei dawn a ni.

Norway rama an league sang ber, Eliteserien an tihah Viking FK hi an kai chho tawh a, hei vang hian Lallianzuala Chhangte hian contract a ziak thei ta a nih ngat chuan inelna boruak sang tak chu a tawng chho dawn tihna a ni ang.

“Lallianzuala Chhangte chuan Norway a pan ta a, tun thla tawp hmaa Indian national camp neih tura tel hman turin India ramah chuan a rawn kir leh hman dawn a. National camp awm hma hian Norwegian club-ah hian contract a ziah dawn leh dawn loh chu a chiang hman dawn a ni,” tiin hre chiangtu pakhat chuan a sawi.

Tun tuma Viking FK a trial a neih theihna atana hma latu, German Football Academy director Krish Roy chuan, “India rama footballer la naupang tak, tha deuh si te tana hun tha siamsak hi kan tum berte zinga mi a ni a. An thiamna te hi India ram chhung mai ni lo, zau zawka an pho chhuah theihna atan hma kan la zel dawn a. India ram leh Europe khawmualpui thlun zawm hi kan duh ber a ni,” a ti.

February thlaah khan Viking FK hian Lallianzuala Chhangte hi an lo ko tawh a, Delhi Dynamos in an koh let leh thut avangin trial pawh a nei mumal hman ta lo kha ania. Tunah chuan Indian Super League (ISL) club-ah contract a nei ta lo bawk a, zalen takin hun a hmang thei tawh dawn a. Trial hi a nei fuh a nih chuan free agent angin Norwegian club hi a zawm thei ang.

Kum tir lama trial a neih tum hian Viking FK coach chuan tha a ti hle a, a hnuah pawh a fak zui nghe nghe a. Player che rang tak, thiam tak mai, ball khawih thiam em em niin a sawi a, a thiamna chu a duh hle niin a sawi bawk a. Tum anga a awm thei a nih chuan Sunil Chhetri, Gurpreet Singh Sandhu leh Bhaichung Bhutia te hnung zuiin Europe khawmualpuiah a inkhel ve thei dawn a ni.