Vijay Hazare Trophy-ah Mizoram tan chanchin chhinchhiah tlak tak mai a thleng a, 26.8.2018 (Nilaini) ah Mizoram chu Sikkim nen an inkhel a, a vawi khatna atan Mizoram an chak.
Sikkim chu toss-ah an chak a, field hmasak an thlang a. Mizoram chuan an vaw hmasa a, Captain K. Vanlalruata leh C. Lalrinsanga te chuan an vaw hmasa a, Lalrinsanga hian ball 32 atangin run 12 a siam a, Vanlalruata chuan 8 atangin run 3 a siam bawk a, an pahnih hian LBW vangin an out ve ve a.
Taruwar Kohli chu Mizoram batsman zingah a chungnung leh chiang hle a, century a siam leh tawh a. Kohli hian ball 126-ah run 113 ngawt mai a siam a, a tawp thlengin a out lo a ni.
Akhil Rajput chuan ball 57-ah run 33 a siam a, Sinan Abdul Khadir chuan ball 31-ah run 36 ngawt mai a siam bawk a. Michael Lalremkima chuan ball 25 atangin run 9 a siam a, Saidingliana Sailo (wicket-keeper) chuan ball 16 atangin run 18 a siam a, Lalnuntluanga chuan ball 3 atangin run 5 a siam hman bawk a, a tawp thlengin a out hman lo a. Mizoram tan hian mi pathumin an vaw ve hman ta lo a ni.
Over 50-ah Mizoram hian run 252 an siam a, mi 6 an out hman a, extra 23 (b 0, lb 1, w 20, nb 2, p 0) an nei bawk a. Sikkim bowler zingah Plazor Tamang chu a che tha ber a, wicket 3 a la a, Mendup Bhutia leh Lee Yong Lepcha te chuan wicket pakhat ve ve an la bawk.
Sikkim hian an vaw ve leh a, chak turin run 253 an siam a ngai a, mahse over 47.3 ah an vaiin an out vek a, run 210 chiah an siam hman a, Mizoram chu run 42 in an chak phah ta a ni.
Plazor Tamang chuan ball 57 atangin run 47 a siam a, Sikkim tana run vaw chhuak hnem ber a ni a. Lee Yong Lepcha chuan ball 63 atangin run 42 a siam a, Mendup Bhutia pawhin ball 37 atangin run 40 a siam bawk a ni.
Mizoram bowler zingah Sinan Abdul Khadir chuan wicket a la hnem ber a, wicket 4 a la a. Lalnuntluanga chuan wicket 2 a la a, HM Ralte, Marema leh Taruwar Kohli te chuan wicket 1 theuh an la bawk a. Mizoram hian extra 12 (b 0, lb 2, w 10, nb 0, p 0) an pe a ni.
Vawi 4 khelh tawhah Mizoram hi vawi khat an chak ve ta a, point 6 an hmu tawh a, team 9 awmna Plate Group-ah 8-na an ni a, an hnuaiah hian Sikkim an awm a ni.