10 Sep 2019 03:27

bakteaJr.

Mizo tlangval

​Vidic-a’n hmachhawn harsa a tih ber te a sawi

Manchester United captain hlui Nemanja Vidic chuan Premier League a khelh chhunga hmachhawn harsa a tih ber te a sawi chhuaka, an theuneu lo hlawm hle.

Serbian defender rinawm Vidic hian Old Trafford-ah kum riat zet hun a hmanga, trophy thahnem tak chawiin, chung zingah Premier League title panga leh Champions League-te an tel.

Kum 37 mi Vidic hian kum 2006 khan Spartak Moscow atangin Manchester United a zawma, Premier League-a a khelh chhungin Premier League defender tha ber zinga mi a ni chho ngar ngara, kum 2014 khan Old Trafford chhuahsanin Inter Milan a zawma, kum 2016 khan inkhelh a chawlhsan fel.

Vidic chuan Premier League a khelh laiin striker tha tak tak a hmachhawn nuala, chung zingah chuan Tottenham leh Stoke City striker hlui Peter Crouch, Chelsea legend Didier Drogba bakah Manchester City goal thun khawl Sergio Aguero leh tuna Barcelona tana khel mek Luis Suarez-te hming a lamchhuak.

Vidic chuan, “ Ka hmachhawn hmasak ber pawl kha chu Peter Crouch a ni a, metre hniha sang player a hma in ka la hmu ngai lo; Crouch ka hmuh hmasak ber khan, ‘Engtin nge hepa hi vawiin hian ka hmachhawn ang?’ tih zawhna ka inzawt nghe nghe.

“Drogba kha player fing em em mai a ni a, defender-te thluak a chawk buai thiam hle. Drogba kha chuan game khelh chhung zawngin min chhaih buai a ni bera, kan vanglai tak ve ve in kan inhmachhawn a ni.

“Aguero hi chuan ball lokalna tur hi a hisap thiam em em a, pit zeuh dan tur hi a hre hle. Box chhunga a awmin a hlauhawm em em a, vawileh khatah a inher thut thut theia, a bikin English defender palian ho tan chuh a harsa hle thin.

“Suarez kha chu a che rang lutuk kha a ni ber a, a che rang lutuk kha a thil tih pawh a mah khan a hriat hman ka ring lo, mahse a hlawhtlinpui em em bawk si. Player direct tak a ni a, goal khung tum em em mi a ni a, minute 90 chhung a tlan thei a, a chau thei lo a ni ber,” a ti.