09 Sep 2019 10:34

inkhel

Video games hmangin ei a zawn theih: Gareeboo

India rama YouTuber che fuh ber pawl, Kunal Saraf chuan channel pahnih a nei a. Mi tam zawkin Gareeb tia an hriat lar channel pahnihte chu Gareeb leh Gareeboo te an ni a. Gareeb hi thil nuihzatthlak deuh hlek a dahna niin, Gareeboo chu a games khelh vel a dahna a ni thung.

Kunal Saraf hian a channel pahnihah hian subscriber a ngah chho tawh viau a, 1 million an tling ve ve tawh a. Tun hnaiah khan khawvela 4 PUBG Mobile content siamtu tha zinga thlan chhuah niin, PUBG Mobile Star Challenge (PMSC) 2019 a tel turin a tling a, Team IND ah a khel dawn a ni.

Gareeboo hian pawl 10 a zir zawh hnuah Joint Entrance Examination (JEE) atan a inbuatsaih zui a. Ama sawi danin chemistry chu a thiam lutuk lo a, mahse physics chu nuam a tih ber pawl a ni thung a, hei vang hian JEE pal tlang thei turin physics chu a innghahna ber a nih thu a sawi.

IIT centre lar tak maiah chuan luh theih tumin theihtawp a chhuah a, JEE Advanced paper-ah chuan 105 a hmu a, exam pui chu a pal tlang thei a. Hetih lai vel hian chhungkaw thil eng eng emaw a thleng chho a, tun dinhmunah hian a din theih phah ta a ni.

Saraf chuan mahni intodelh theih chu a tum bulpui ber a ni a, hetianga awm thei tur hian kawng pawh a dap chho tan a. Hetiang lai vel hian League of Legends stream na channel Carry chu a tlachhe tan a, Gareeboo chuan helam hi a ngaihven hle a. YouTube lam buaipui chu a rilruah a tla na ve tan a, a chhungte leh thiante chuan an thlawp lo viau mai a. A zirna chu chhunzawm turin an duh a, hetianga a thil tih tum an remtihpui vak loh hnuah hian YouTube hmanga eng emaw tak tih chu a tum nghet sauh a ni.

June 2017 ah khan a channel hmasa Gareeb chu a ti tan a, a tir atang hian ngaihventu a nei tha chho nghal viau mai a. Thla khat pawh a ral hmain subscriber hi a nei hnem hman viau a, June 24, 2017 ah subscriber hi 2k ngawt a nei hman a. July 3, 2017 ah chuan 17k ah an chho dawrh hman a. Amaherawhchu, copyright thil vangin a channel chu an tihtawpsak a ni.

Kunal Saraf chuan, “Khatia ka channel an rawn titawp kha ka tan chuan mumang rapthlak tak ang mai a ni ber a, min thawng hle a ni,” a ti.

A channel an tihsawpsak hnuah hian Gareeboo chu a beidawng duh mai bik lo a, hemi ni vek hian channel dang a siam zui leh nghal zat a. A channel thar hming chu a dangdai viau na a, a sei em avangin a duh leh chiah lo a. A thiante hnenah channel thar hming tur chu a zawt kual a. Pawisa hman mai mai duh lo mi a nih avangin a thiante chuan Gareeb tiin an ko thin a, hei hi changchawiin Kunal chuan a channel hmingah pawh Gareeb tih a phuah a. “A hma chuan mi hian Gareeb tia min koin min chhaih thin a, tunah chuan he hming hi ka chhuang tawh hial zawk a ni,” tiin a sawi.

2018 kumah khan Gareeboo chuan games khelh nuam a ti thar leh a, “Pawl 10 ka nih lai khan video games khelh kha nuam ka ti thei hle a, ka khel nasa thei viau thin,” a ti a. Nikumah khan bike leina atana a pawisa khawlin computer thar a lei a, hemi hnuah hian PUBG Mobile atanga GTA-V thlengin a khel kual nasa hle.

“Games khelh nuam ka ti a, a bikin thawnthu bik nei hi ka khel nasa hle a. Hetiang lampang games khelh hi chuan a boruakah kan cheng chiang bik tlat a ni,” tiin Kunal chuan a sawi a ni.

Tun hnuah chuan Gareebo hi PUBG Mobile bikah a insawr bing deuh tawh a, games puala a siam channel Gareeboo ah chuan a stream nasa hle a. Tunah chuan a channel subscibe tu hi 1 million chuang zet an ni tawh a. PUBG Mobile bakah hian GTA-V te pawh a stream tel thin a ni.

A thil tawn chungchang an zawhna thenkhat hi han tarlang ila.

A tirah chuan
= A tir lamah kha chuan ka chhungte khan ka thil tih chu pawm harsa an ti a, min thlawp lo hle a. Tunah chuan hun a kal ve ta deuh a, engtin mah min dal tawh lo a, pawi an ti tawh lo hle.

Streamer tharte tan
= Mahni nih anga awm a pawimawh a. Tunah hian khawvelah Gareebooo thar an awm thei tawh dawn lo a, streamer tharte chu an awm zel dawn a. Mahni nihna ang leh duh anga streaming tih mai a tha a, tu mah entawn loh a tha ber.

PUBG Mobile Club Open (PMCO)
= PMSC vote hmu hnem pali zingah a tel a, Berlin, Germany a PUBG Mobile Club Open (PMCO) a tel tura thlan a ni a. Kal turin a inpeih vek tawh hnuah visa chungchangah thil fel thei lo a awm a, hei vang hian a kal theih loh phah a. Hetiang a nih avang hian professional team (Indian Tigers leh Team IND) te chuan India ramah PMCO prelims an khelh a ngaih phah a ni.

Taiwan-ah PUBG Mobile Star Challenge shooting
= A nuam khawp mai a, an inbuatsaihna a tha a, tu te pawh khan nuam kan ti hlawm a. Mi thar tam tak ka tawng a, kan inpawh hlawm hle a, thil tawn thar duhawm tak a ni.

India rama creator lian ber pawl
= Ka naupan lai atangin hetiang dinhmuna ka din theih hi ka ring pha ngai lo a. Khatiang lai kha chuan mobile phone ka nei lo a, internet hman tur ka nei ngai lo a. YouTube hi eng nge a nih ka hre ngai lo hrim hrim a. Tun hnuah Jio 4G kan hmelhriat ve a, hemi hnuah chauh hian khatiang thil kha ka hre ve tan chiah a ni.

India rama esports chungchang
= Mi hian gaming hi eizawnna atan a hman theih tih hi an hre mang lo a ni ber a, professional nih theihna kawng a inhawng zau hle a. Mi tam zawk hi chuan games khelh chu nuam tawlna ang deuhin an ngai zel a. Tunah chuan a nuam lampang chauh a ni tawh lo a, mi tam tak tan chuan eizawnna rintlak em em mai a ni tawh a ni.