​Vice-captain rinawm Guti Haz

01st April 2020, 06:04PM

Guti Haz hi a hmingpum chu Jose Maria Gutierrez Hernandez a ni a, mahse Guti tih mai hian a lar bera, kum 1976 October ni 31 khan Torrejon de Ardoz, Spain-ah lo piangin tunah hian kum 43 mi a ni mek.

Guti hi Rea Madrid chhulchhuak liau liau a ni a, Real Madrid C leh Real Madrid B tan te a khelh hnuah kum 1995 atang khan Real Madrid senior team-ah chhovin, kum 2010 thleng a awma, hun rei tak Raul-a hnuaiah vice-captain a ni.

Ft 6-a sang Guti hian Real Madrid senior team-a kum 15 a awm chhungin game 542 lai a khel hmana, trophy 15 chhawiin, chung zingah chuan UEFA Champions League nomawi 3 leh La Liga title panga a tela, Spain tan kum 1999 atang khan khelin vawi 13 chiah a inlan thung.

A career tirah chuan Guti hi striker ni mahse a hnu lawkah playmaker a ni chho a, midfielder tha ni turin neih loh a nei lo tluk a ni a, a vision a tha in, ball a thiam em ema, a creative bakah a passing a tha vel vek bawk. Player tangkai leh versatile tak a ni a, a workrate a tha in, midfield chin hmalamah chuan khelh theih lohna a nei lo a ni ber.

Attacking midfielder angin khel ber mahse second-striker ang pawhin a khel theia, wing lam defensive midfield lam thleng pawhin a khelh theih bakah deep-lying playmaker ang pawhin a khel thei bawk. Player zaidam a ni hran lova, a career chhungin league-ah ringawt vawi 8 hnawhchhuah a ni nghe nghe.

Sawi tawh angin Guti hi a tirah striker angin a khel thina, Real Madrid senior team lama a awm tirh hian Fernando Morientes inhliam avangin striker-ah khel rim viauin, goal pawh khung thei mahse kum 2002-a Real-in Ronaldo an lei hnuah Guti hi midfield lamah pawh let leh a ni.

Kum 2006 khan Real chuan AC Milan atangin Kaka an lalut dawn anga sawi a awm nasa viaua, hemi avang hian Guti pawh hi Atletico Madrid-a chhuak tur anga sawi ni mahse, Real-a cham chhunzawm zel chu a thlang ta zawka, Kaka pawh chuan AC Milan a chhuahsan ta lo.

Kum 2006-a Zinedine Zidane a retire hnuah Guti hi a khelh thiamna playmaker role-ah a khel tam chho leh tana, a short pass leh through ball tha tak tak te chu Real Madrid hian an chhawr hle a, hemi season hian assist a nei nual nghe nghe.

Kum 2009-a Real-in Kaka an lak khan Guti hi a la khel tam viau tho a, mahse kum 2009-10 season-a Copa del Rey inkhela Alcorcon an hmachhawn tumin half time-ah Guti hian an manager Manuel Pellegrini chu a chhuahchhala, hemi avang hian hun eng emaw chen squad-ah telh a ni lo. Khelh tir a nih chhoh lehin Kaka a lo inhliam bawk avangin Guti hi a khel tam leh viaua, hemi season zawh thleng hian a khel rim chho viau.

Kum 2010 nipui khan kum 25 dawn Real Madrid-a hun a hman hnuah Turkish club Besiktas a zawma, kum hnih daih contract ziakin kum khat a awm hnuah, kum 2011 khan Besiktas hian an chhuah zalena, inkhelh a chawlhsan zui ta a ni.

Inkhelh a chawlhsan hnuah management lamah Guti hi a luta, kum 2013 atanga kum 2018 chhung khan Real madrid youth team lam enawlin, kum 2018 leh kum 2019 chhung khan Besiktas assistant manager a ni leha, kum 2019 khan Spanish club Almeria enkawl tanin tun thlengin Almeria manager hi a la ni.

Copyright © inkhel.com 2024. All rights reserved.