19 Jan 2019 04:05

inkhel

Venus hnehtu Halep leh Serena an intawng dawn

Simona Halep chuan Australian Open khelh mekah Venus Williams chu hnehin, Venus-i nau Serena Williams nen an inhmachhawn dawn a ni.

World No. 1 Simona Halep leh Venus Williams te chu Margaret Court Arena-ah an inkhel a, he inkhelah hian American star Venus chu a che thei meuh lo a, a tawpah Romanian star chu 6-2, 6-3 in a chak a, last 16-ah Halep hian Serena a hmachhawn dawn a ni.

Halep hian 2016 US Open hnuah Grand Slam title 23 ngawt la tawh Serena hi a la hmachhawn leh miah lo a. Venus nen an inkhelah hian a nawr na hle a, theihtawp a chhuah a, a tawp thlengin a inthlahdah hauh lo a, hei vang hian Serena nen an inkhelh hunah pawh a inrintawkna pawh a sang viau tura ngaih a ni.

Simona Halep hian unforced errors 21 neiin, Venus Williams chuan 24 a nei a. Halep hian break point lak theihna hun vawi 10 a neihah vawi 5 chu a hlawhtling a, Venus ve thung chu hetiang hun vawi ruk a neihah vawi khat chiah a hlawhtling thung a ni.

First serve percentage ah pawh Halep hi a sang zawk a, 69% a nih laiin Venus ve thung chu 59% chauh a ni a. Halep hian first serve point 67 hmuin, second serve point 63 a hmu a. Venus chuan first serve point 58 hmuin second serve point 31 chauh a hmu thei a ni.

Serena Williams a hmachhawn leh tur chungchangah Halep chuan, “Kei hi rin kai lo zawk ka ni a, chu vangin ka tan chuan engmah hloh tur a awm chuang lo a. Theihtawp ka chhuah ang a, he chona hautak zet mai hi pal tlang theih ngei ka tum dawn a ni,” a ti.

Anni pahnih hi a hmain vawi kua an lo inkhel tawh a, hengah hian Serena hi a chungnung hle a, vawi riat ngawt mai a chak tawh a, Simona Halep hi vawi khat chiah a la chak ve thei a ni.