​VAR kan hmang zel dawn: Premier League CEO

05th February 2020, 04:02PM

Premier League CEO Richard Masters chuan sawiselna tam tak karah VAR chu season tharah pawh an hman chhunzawm zel tur thu a sawia, mahse hemi rual hian April thla hian a kalhmang leh a hman dan chu ennawn leh endik a nih tur thu a sawi tel.

Tun season atangin Premier League-ah VAR hman tan a ni a, mahse Premier League-a VAR hman a nih dan hian sawisel a hlawh hle a, YouGov chuan hemi chungchangah hian survey neiin, an survey atanga an hmuhchhuah chu mi 10 zela mi 6 chu VAR hman a nih mek danah an lungawi lo anga chhut a ni.

Masters hian anmahni lamin research an neih ve ah erawh VAR-a lungawi hi mi tam zawk an nih thu a sawi thunga, mahse VAR hman dan a nih dan thenkhatah an lungawi lo mai tih a sawi.

Masters chuan, “VAR hian eng mah a tih chhiat ka hre lova mahse endik leh ennawna hmasawn erawh a ngai tih chu phat rual a ni lo. Kan thlauthla dawn reng reng lova, VAR hi hmasawn tir kan tum mai zawk dawn a ni.

“Eng angin nge VAR hi hman an duh tih te hi kan sawi ho dawna, VAR in hma a sawn theih dan tur te sawi ho a ni dawn. Tun season-ah chuan kan hman tanna a ni a, kan ti mawp mawp rih dawna, season tharah erawh theihtawpa hmasawn kan tum dawn a ni,” a ti.

Sawi zelin Masters chuan, “Match-a thil thleng pawimawh zualah VAR hian tih dik hi 90% chuang a nei a, league table awm danah pawh a tha zawngin nghawng a nei. Thutlukna siam chhung te a la rei mah mah thina te, a la tha tawk lo hle a mi pawhin hei hi an duh loh a ni; mahse VAR hi a tha lovin ka hre lova, Premier League hian hma a sawn zela entu pawh an pung a ni,” a ti bawk.

Copyright © inkhel.com 2024. All rights reserved.