Nilaini zingkar dar 1:30-ah Carabao Cup semi-final first leg khelh a ni a, London derby niin Tottenham chuan Wembley Stadium-ah Chelsea an lo mikhuala, Tottenham hi si khat faiin an chak.

Goal awm chhun hi England captain Harry Kane-a thun a ni a, penalty spot atangin 27mins-ah a khung. Tottenham lamin penalty an hlawhchhuah danah hian sawi a tam hle a, chi hran hrana sawitu an tamin, ngaihdan a inang lo tlang hlawm hle.

Tottenham-in penalty an hlawhchhuah dan han en dawn ila; Spurs defender Toby Alderwereld chuan anmahni half atangin tha takin Kane-a um turin ball a vawrh luta, ball vawrh a nih chiah hian Kane hi offside a ang hle a, replay-ah erawh inhnialna a tam a, Chelsea defender-te nen an inzawn chiah ti pawl awmin, a offside chiah chiah ti pawl an awm bawk. Lines-man erawhin offside ni ngeia ngaiin a flag ken a phara, mahse referee Michael Oliver chuan ham lo. Lines –man in a phar takah chuan Chelsea defender pathum chuan Kane hi an um tawh lova, an ding titiha, Kane erawhin ball hi tlanpui zelin Chelsea box chhungah a khalh luta, box chhungah hian lines-man in a phar ti hrelo khawvela goalkeeper manto ber Kepa Arrizabalaga chuan Kane hi ball chhuhsak tum mahse ball khawih lovin Kane a titlu.

Kepa-a’n Kane a tihtluk hian referee chuan foul a ham a, Chelsea player-ten an bawr nghal, a chhan chu lines-man in a phar tawh miau a, ball hi a nung tawh lo a tih theih. Hun eng emaw chen chhung Video Assistant Referees (VAR) chuan Kane hi a offside leh offside loh a ennawna, lines-man phar chu sutin VAR chuan Kane chu offside lo tiin thultukna a siam a, hetah tak hian referee chuan Spurs hi penalty pe zuiin, Kepa chu yellow-card a pe bawk.

Lines-man hian phar lo se chuan Kepa kha Kane-a lakah a foul chiang hle a, Spurs hi penalty hlawhchhuak tur an ni chiang. Mahse lines-man in offside tiin a phar a, Chelsea defender-te an ding titih. Lines –man hian phar lo mahse Chelsea defender-te hian Kane hi an umpha tawh dawn chuang lo pawh a ni maithei, mahse lines-man in a phar chuan referee-in a tirah hmu lo mahse ball hi a nung chhunzawm thei tawh lo, referee-in lines-man in a phar tih a hriat hun hunah lines-man in a phar atangin ball a thi nghal tur a ni. Hetiang hi kan hmu fo thin a, striker ten chak takin ball an tlan puia, referee-in ham lawk lo mahse lines-man in offside a phar tih a hriat hnuah referee chuan hamrik hamin, offside-na hmun atangin lehlamin inkhel bul an tan leh mai thin.

VAR-in Kane-a offside leh offside loh a rawn ennawn kha thil hriatthiam har lai chu a ni a, Chelsea supporter lam tan chuan thil ‘fair’ lo tawp khawk a ni thei a, an demawm hran love. VAR hi a hmanna tura dan awmsa chu penalty thilah emaw direct red card inpek chhungchangah a ni a, referee-in player a hai palha midang daih card a pek chungchangah pawh VAR hi a hman theih. Heng bakah hian goal a luhin offside a ni nge ni lo leh foul a awm nge awm lo pawh VAR hmangin a en theih bawk.

VAR hman theihna kan sawi tawha, Kane-a offside leh offside lohna angah khan hman a ni ngai lo, a chhan chu goal a lut lem lo. Last-man a ni kan ti maithei, mahse lines-man in a phar tawh miau chuan ball a nung tawh lova, inkhel a ti khailak tawh bawk. Hetiang ang thil hi tennis-ah pawh kan hmu thin a, chair umpire-in out a tih avanga lehlamin an lo lak lovin, ball vawtu khan challenge a hmang thei. Challenge-ah ennawn a nih hnuah a lo out si loh chuan khami point kha khelh nawn a ni mai thin. A chhan chu umpire-in out a ti tawh a, inkhel a khailak tawh miau a ni. Chutiang chiah chu Kane-a chungchangah pawh hian a ni a, lines-man in a phar tawh chuan defender-in an um dul dul tawh ngai lo, ball khalhtu in hre rih lo mahse offside a ni tawh tho tho a ni.

Offside nazawng hi VAR ennawn tur a ni lova, lines-man in a phar lova goal-ah a luh nghal bawk angah hian ennawn tur a ni. Entirnan, winger emaw ful-back ten box chhungah ball an cross luta, striker ten an lo tauh goal nghal angah hian offside a lo niha lines-man in a hmuh loh chuan ennawn theih a ni a, goal pawh sut theih a ni. A lehlam zawng pawhin, goal-ah a luha lines-man in a lo phar a goal-ah pawm a nih lovin, VAR-ah ennawn theih a ni a, offside a nih loh chuan goal-ah pawm a ni anga, a chhan chu hetiang ang dinhmunah hian engmahin inkhel a ti khailak tlat lo.

A tlip nana ka sawi duh chu Tottenham vs Chelsea inkhelah khan referee-in Tottenham a tan tih lam emaw a tisual ta viau e pawh a ni hran lo. A awmzia berah chuan VAR hi thil thar a ni a, la hman than loh a ni; a bikin English refree-te chuan an la hmelhtiat tha lo hle a tih theih. Hetiang a nih avang hian a technology chu tha viau mahse a hmangtu te lam hi mihring tho an la nih avangin tihsual a la awm lo thei lova, dan leh hraite pawh a la tlem in hriatthiam pawh a la harsa hle. Eng nge thleng thei tih te pawh hriat kim theih a la ni lova, famkim tur chuan tihsual a awm phawt a ngai a, tihsual a awm atang khan thil thleng thei leh thil ni thei kan hre zel anga, VAR pawh hi ennawn a ni zel anga dan leh dun siam that leh siamrem a ni zel ang. Football pawh a tirah offside-te a awm lova, goalkeeper-te back pass in keeper-in an lo man thei thin. Mahse game a tih huhnawm lohin a fel tawk lo tih a lo lan zel hnuah ennawn a ni a, dan leh hraite siam that niin, siam belh a ni chho zela vawiin hi kan lo thleng chauh a ni.

Tottenham-in Chelsea an hneh dan chungchangah pawh sawi a tam, kan tan zawnga zirin kan ngaihdan pawh a 'bias' deuh a ni maithei. Chelsea fans tan phei chuan a na hle  dawn a, Carabao Cup mai ni mahse Tottenham an nih avang hian Chelsea fans lam pawhin an la nazual deuh pawh a ni mahna, sawi tawh angin an demawm hran lo. VAR hi thil thar a ni a, eng emaw chen chu sawiselna tur a awm dawn a, vanneih pui leh vanduai pui hi an la awm dawn chauh tih hi i hre tlang theuh phawt rih mai ang u.