Arsenal chuan Emirates Stadium-ah West Ham United an mikhual a, London derby inkhelah hian Arsenal chuan si khat faiin hnehna an changa, point 3 an hlawhchhuak.
He inkhelah hian Arsenal goal neih chhun chu bench atanga dah luh Alexandre Lacazette chuan a thuna, a team tan goal pawimawh tak a khung.
Arsenal hian khelh 28-ah point 40 hlawhchhuak tawhin 9-naah an awm meka, West Ham ve thung erawh hian khelh 29-ah point 27 hlawhchhuak tawhin 16-naah an awm mek a ni.
West Ham United chuan kar hmasaa Southampton an hneh tuma an khelhtirte hlir kha an luhtir leh a, tlar hma lamah kar hmasa lama goal thuntu pathum Bowen, Haller leh Antonio te bakah Fornals te chu awmtir an ni.
Gunners chuan 3-2 a Everton an hneh tuma an khelhtir pathum chu an thlak danglam a, Sokratis, Saka leh Premier League huanga vawi khat inlanna tur Pablo Mari te chu tlar hnungah an intlar a, inhliam vangin Shkodran Mustafi leh Sead Kolasinac te tel thei lovin, Hector Bellerin chu substitute bench lamah a awm thei tawh thung.
Arsenal hian first half an khel tha lem lova, an tha a tho lo a tih theih. Hammers hi a tir atangin an tal na a, inkhel tan tir teah Jarrod Bowen chuan si ban a pet per nghe nghe a, Michail Antonio pawhin yard thum vel lek atangin first half ah hian a chance neih a hlah bawk. Arsenal lam pawhin first half-ah chance tha an nei a, Greek defender Sokratis chuan Aubameyang-a cross tha zet chu crossbar a lo tauh per.
Arsenal hi first half aiin second half ah an khel tha zawka, mahse West Ham pawh hlauhawm lehin darkar khat khelh a nih hma hretin Antonio bawk chuan Aaron Cresswell-a cross atangin chance tha nei mahse a hlah leh.
Inkhel bul tan lo; darkar khat vel chiah chiah khelh a niha khelmual rawn lut Lacazette chuan 80mins khelh a nih hma hretin inkhela goal awmchhun a khunga, Aubemayang-a hnen atanga ball lo kal chu Ozil chuan Lacazette-a tan lo tauhin thla in, Lacazette hian goal-ah a chantira. A tirah Ozil hi offside angah ngaih niin goal hi pawm nilo mahse VAR lamin minute hnih vel zet hnuah Ozil hi a offside lo chiah chiah tiin goal hi pawm a ni leh ta zawka, hei hi Arsenal chuan an chakpui ta a ni.
Mual neitu Arsenal hi an khelmuala West Ham an lo mikhual hnuhnun vawi 10-ah vawi 9 chu an chak thei a, Hammers hi Arsenal nen league game an khelh hnuhnun 23-ah vawi 2 chiah an chak ve thei thung a ni.
Arsenal 1-0 West Ham
(Lacazette 78’)
Player Ratings
Arsenal: Leno 7, Sokratis 7, Mari 6, Luiz 6, Saka 8, Xhaka 6, Cebellos 7, Pepe 7, Ozil 7, Aubameyang 7, Nketiah 6. Subs: Bellerin, N/A Lacazette 7, Nelson 5.
West Ham: Fabianski 7, Ngakia 6, Ogbonna 7, Diop 6, Cresswell 6, Noble 7, Rice 7, Fornals 6, Bowen 7, Antonio 6, Haller 6. Subs: Anderson N/A, Snodgrass N/A, Soucek N/A.