India Open neih zawh takah MC Mary Kom chuan Zirtawpah khan Vanlalduati a hneh a, a title kawl lai a humhim.
Guwahati khawpuia Chandra Bordoloi Indoor Stadium-ah Zirtawpah khan final khelh a ni a, stadium chhunga mipui khat vek hmaah India ram boxer langsar zualte chu an che tha hlawm hle a. MC Mary Kom, Shiva Thapa, Laishram Sarita Devi te bakah Amit Panghal te chuan an khingpui an hneh vek hlawm a ni.
51 kg category final-ah world champion lo ni tawh thin MC Mary Kom chu national champion hlui, Mizo boxer Vanlalduati nen an inhnek a, Manipuri boxer Mary Kom hi 5-0 in a chak a, gold medal a la a ni.
60 kg category-ah Laishram Sarita Devi leh Simranjit Kaur te an inhnek a. Simranjit hi 64 kg category-ah world championships bronze medallist lo ni tawh a nih bakah, Sarita ai hian kum 14 ngawtin a naupang zawk a, a vanglai tak tak a hmang chho mek a, hei vang hian Sarita tan chuan a huphurhawm tham ve hle a ni.
Sarita chu tawn hriat ngah a ni bawk a, a lo inhnek hnem tawhna chu a chhawr tangkai a, a che kual reng a, left-right combination a hmang tangkai em em bawk a, a tawpah 3-2 a chakin gold medal a la thei ta a ni.
A chak chiah hian mittui parawl teuh chungin Sarita Devi chu van lamah a hawi chho a, cancer vanga thi ta a nu tan a chak chu a hlan zui a. “Nikum November thla khan New Delhi khawpuia World Championships kha ka nu chuan cancer vanga buai chungin a lo en ve a. Damdawi ina a mutna khum atangin min lo thlir a, quarter final-ah ka chak thei ta lo a. Ka chak loh atanga ni thumnaah min thihsan zui ta a. Engkim mai hi a tan ka hlan a, tunah chuan Olympic gold medal la thei ngei turin theihtawp chhuah ka tum a ni,” tiin kum 37-a upa Sarita hian a sawi.
Asian Games gold medallist Amit Panghal chuan boxer tha a nih zia a lantir chiang hle a, 52 kg final-ah a khingpui Sachin Siwach chu 4-1 ngawtin a hneh thei a. Pangal hi Siwach ai chuan tawi zawk mahse an inhnek lai hian rilru fim tak pu chungin a che a, World Youth Champion pawh lo ni tawh Siwach chuan a hneh thei ta lo a ni.
Assamese boxer Shiva Thapa chuan 60 kg final-ah champion lai Manish Kaushik a hmachhawn a, Shiva Thapa hi 5-0 ngawtin a chak a, a vawi khatna atan gold medal a la ve a ni.
Results:
Men
49kg: Deepak bt Govind Sahani 5-0
52kg: Amit Panghal bt Sachin 4-1
56kg: Chatchai Decha Butdee (Tha) bt Kavinder Singh Bisht 3-2
60kg: Shiva Thapa bt Manish Kaushik 5-0
64kg: Colin Rocharno (Mri) bt Rohit Tokas ABD
69kg: Ashish bt Duryodhan Singh Negi 4-1
75kg: Eumir Felix Delos Santos (Phi) w.o. Ashish Kumar
81kg: Manish Pawar bt Brijesh Yadav 3-2
91kg: Naman Tanwar bt Sumit Sangwan 5-0
+91kg: Satish Kumar bt Naveen Kumar 4-0
Women
48kg: Josie Gabuco (Phi) bt Monika 3-2
51kg: Mary Kom bt Vanlal Duati 5-0
54kg: Jamuna Boro bt Y. Sandhyarani Devi 5-0
57kg: Neeraj bt Manisha Maun 5-0
60kg: Sarita Devi bt Simranjit Kaur 3-2
64kg: Francessa Amato (Ita) bt Ankushita Boro 5-0
69kg: Assunta Canfora (Ita) bt Lovlina Borgohain 3-2
75kg: Bhagyabati Kachari bt Pooja 3-2
Best boxers:
Mipa:
Shiva Thapa, India
Hmeichhia:
Francesca Amato, Italy