Van Persie chuan Fenerbache a pan dawn ta tak tak niin a lang ta, a agent Kees Vos chu tunah hian Istanbul-ah a awm mek thu leh hun reilote chhungin inremna an neih tur thu The Guardian chuan a tarlang.

The Guardian-in a tarlan zel dan chuan kum 31 mi Van Persie leh Fenerbache hi an inrem chho mek a, Van Persie hian kum 4 chhung Turkish club tan hian khel turin contract a ziak dawn a ni.

Van Persie-a nupui chu kar liamta mai khan Istanbul lamah hun a hmang nia tarlan a ni bawk a. Dutchman hian a hma hun chungchang chu a chhungte thutluknaah a dah thu a lo sawi tawh a, Dirk Kuyt pawhin Van Persie hi thurawn a pe nia tarlan a ni a. Dirk Kuyt chuan Van Persie chu Turkey lama a hun tawp hmang turin a hrilh bawk, hun reilote chhungin a a khawsak dan tur kimchang kan hre thei turah ngai ila.

Van Gaal-a'n United a enkawl dawn khan a hnampui Van Persie chu captain-ah a ruat dawn nia thuthang a tam hman hle. Tin, Van Gaal chuan a hnampui hi a duhsak hle dawn nia rin a ni bawk. Mahse rin angin Old Trafford-ah thil a kal lo, inhliam vangin a chawl deuh ren rawn a, Van Gaal chuan Rooney chu captain-ah a hman bakah Van Persie a dam hnu pawhin striker rinrawlah a hmang ta bawk si lova, Van Persie hian football-a a hun hnuhnung hlawk taka hman tumin Turkey lam pan mai a tum dawn niin a lang ta.