A zawnin English Premier League-ah club lian pahnih leh Top 4 an chuhpui Tottenham leh Liverpool an hneh. An hneh satliah mai a ni lova, United game that ber tum a khawi emaw zawk zawk chu a ni ngei bawk ang, chutiang khawp chuan an khel tha.

Tottenham leh Liverpool an hmachhawn tum khan United chuan an formation ngai leh player ngaite an hmang a. United Boss Van Gaal chuan tha taka an khelh theihna chhan chu player a khelhtir te ai mahin an khelh dan 'Triangle' style a nih thu a sawi chhuak.

Ajax, Barcelona leh Bayern Munich lo enkawl tawh hian game system a enchhin nual a, Netherland coach nihna atanga Man Utd a zawm tirhin defender pathum chiah te a hmang chhova, a hlawhtlin pui em em lo mai ni lovin, hniam lam an pan. Hetih lai hian tun hnaiah an rawn invawrh chho leh mek a. Spurs leh Liverpool an hneh avangin nasa takin United supporter ten Van Gaal an fak.

Juan Mata leh Marouane Fellaini te thiam taka a chhawr vang ni tein an sawi a. Van Gaal hian Mata hi false winger role a play tir a. Fellaini chu Rooney thlawp turin a dah bawk. Tin, defence pui turin rei tak inhliam vanga a chawlh hnuin Carrick chhawr theih a ni leh ta bawk a. Heng player pathumte hian nasa takin United game-ah danglamna a thlen nia an sawi laih laih laiin Van Gaal hian anni khelh vang ai mahin an system triangle style chu an chak chhan niin a sawi.

" Player khelh tir azir a nih rualin kan system vang a ni a. 1-4-3-3 (4-3-3) formation ah No. 10 role leh No. 6 role kan hmang a. Hodling midfielder emaw striker hnung chiaha kan dah khan awmzia a nei thui hle a ni.

"Kan khelh dan system-ah hian player tangkai bik an awm rualin kan khingpuite azir a ni ve bawk a. 4-3-3 ka thlan tak nachhan chu ball chan hnem a awlsam a. Khawi hmunah pawh triangle angin a khelh theih. System hrang hrang hmanga ka khelh kual tir nachhan pakhat chu ka player neih remchan dan zawnga ka inherrem vang a ni," tiin a sawi.

Van Gaal hian 4-3-3 a hman hmaa a system te chu a hnawl loh thu sawi chhunzawmin,"Game thum emaw game li emaw lekah a chungnung zawk kan ni lo. Inkhel kan thunun em em thin a, ball kan chang tam bawk a. Hetih lai hian Football-a pawimawh ber chu results a ni a, results tha kan hlawhchhuak lo hlauh thin mai mai zawk a ni," tiin a sawi.

Belgian International Fellaini pawhin an manager chu fakin,"Nikum lamah kha chuan khawng taka inkhuahkhirh a nih loh avangin Europe-ah kan inlan thei ta lova, nasa takin kan tlahniam. Kan manager-in min enkawl dan hi a tha a, player ten an that dan bera an khelh chhuah leh theih nan inkhuahkhirhna tha tak hmangin team a enkawl a ni," tiin a sawi.