​Van Gaal-a’n Barca tan Neymar a iai

30th November 2018, 04:11PM

Tum hnih ngawt Barcelona lo enkawl tawh leh Manchester United manager hlui ni bawk Louis Van Gaal chuan Barcelona chu Neymar lei let lo tura a duh thu a sawi.

Kum 2013 khan Neymar hian Brazilian club Santos atangin Barcelona hi a zawm a, kum 2017 thleng chamin, Catalan club hi La Liga title pahnih bakah Champions League nomawi vawikhat a chawipui hmana, goal 105 a khung hman bawk.

Kum 2017 khan khawvela footballer manto ber ni turin Ligue 1 club hausa Paris Saint-Germain a zawma, PSG hian Brazilian forward manah hian euro maktaduai 222 an seng. Paris-a season khat awrh a cham hnuah Neymar hi Barcelona-a let leh tur anga sawi a ni nasa hle a, Barcelona pawhin an lalet hreh lo niin tarlan a ni bawk.

Van Gaal erawhin Neymar chu Barcelona tana a iai thu sawiin, “Neymar laklet hi Barcelona tan hian a tha in ka hre ve lo. Player naupang a ni a hma pawh a sawn zel dawn. Team-player nih a inzir phawt a ngai a, tunah rih chuan team-player a ni lo. Neymar laklet chungchangah hian Barcelona hi an in ngaihtuah chian phawt a ngai a ni,” a ti.

Kum 2017-a PSG a zawm hnuah Neymar hian game 46 khel tawhin goal 41 lai a khung tawh a, trophy pali a chawi tawh. Kum 26 mi hi Real Madrid nen pawh sawizawm ni hman viau mahse tunah chuan Barcelona-a a kir leh mai pawh a rinawm chho ta hle a, tunlai football khawvela thil thleng kan thlir chuan thil thleng thei lo a awm tawh lo tih a lang a ni.

Copyright © inkhel.com 2024. All rights reserved.