July ni 1, 2015 hian Manchester United chuan pre-season training an tan tawh dawn. Hetih lai hian tun nipui bazarah player pakhat chiah an la lei. Van Gaal hian sum a ren nge a duhthusam a veh mek zawk ?
Manchester United Executive vice-chairman Ed Woodward chuan Van Gaal chu a mit it zawng lei nan tun nipui bazarah hian £150m lai a hum tir ran tawh. Biak chu an nei, mahse Depay bak lak an la nei lo. Van Gaal-a'n a ngaihven player thenkhatte tarlang ila.
Sergio Ramos
Kum 29 mi Real Madrid defender hi chu United chuan official takin an dawr tih chiang takin sapram chanchinbu ten an tarlang. Manchester United hian £28.6m in Ramos hi an rim mek a, Ramos pawhin chhuah a lo duh ve bawk nia sawi a ni. United hian kar khatah £230,000 lai Ramos hi hlawh pek an tiam bawk a ni.
Chutih laiin Real Madrid-in Dea Gea an dawrna chungchangah United nen thu mum an la nei thei lo. Ramos nen hian Dea Gea chungchang hi kaihkawp an tum ve ve a ni thei angem ? Tih chu zawhna lian tak a ni.
Morgan Schneiderlin
He French midfielder kum 26 mi hi season hmasa khan Southampton khan an chelh zo dawn lo emaw tih laiin St Mary's Stadium-ah cham a thlang a. Tun nupui bazarah erawh a chhuak ngei dawn ta niin a lang. Van Gaal chuan Bastian Schweinsteiger a beisei tawh lo nia a lan hnuah Schneiderlin lam hi a hawi ta niin a lang.
English Premier League-a holding midfielder tha ber pawl hian goal pawh a khung thei hle, season liamta khan match 30 atangin goal 5 leh assists vawi 6 lai a nei a, United hian an duh tak tak a nih chuan pangai takin Koeman chuan min dawr se a ti a, amanah £25m chuang an chhiar bawk. United hian tun nilaini hian an lak dawn chuan an lak hman an inbeisei, chutih laiin nimin khan Southampton training erawh a zawm tih media te chuan an tarlang a ni.
Edinson Cavani
World Class striker an mamawh zia hre chiang ber tur chu Van Gaal hi a ni awm e. United chuan striker tawrawt tak an melh mek, PSG striker hi lak theih mai inbeiseiin an be mek niin sapram media te chuan an tarlang.
Nikum nipui bazara United record transfer fee-a an lak Di Maria chu PSG chuan an lo it ve khawp mai. Di Maria hi Old Trafford-ah season khatna a hmang ropui lo hle bawk a, thenkhat chuan Falcao ang bawka an chhuah tir leh mai an ring.
Di Maria chuan Old Trafford chhuahsan a tum loh thu sawi mahse United hian Depay an la tawh si a, Di Maria ai chuan striker mamawh niin an inhria a ni awm e, media te chuan United hian Di Maria chu Cavani thleng nan hman an tum niin an tarlang nghe nghe.
Tin, Van Persie chuan kum 30 ral a lo khai ve ta bawk a, hliam a nei chho neuh neuh bawk nen, Turkey club Fenerbahce chuan lak tum mahse express chanchinbu chuan Cavani lakchhuah a nih theih nan Van Persie chu United-in thehchhuah an tum niin an tarlang bawk a ni.
Séamus Coleman
Season liamtaa United chet chhiatna lai chu defence line a ni kan ti lo thei lo. Van Gaal chuan a defence theih tawpa thuam a tum. Gary Neville chhuah hnuah United hian right back tha tak an la nei leh lo kan ti thei awm e.
Sir Alex Ferguson-a hunlai atang tawhin United chuan he Irish defender hi an lo hel tawh a, tunah chuan Van Gaal chuan lakluh a tum tak tak ta niin media te chuan an tarlang. MailOne in a tarlan dan chuan United hian Coleman manah £15m an thehchhuak dawn a, kum 26 mi Everton defender hi tunlai English League-ah chuan defender tha ber pawla ngaih a ni mek a, United hian theih tawpa an rim a nih ngat chuan Everton hian an chelh theih a rinawm loh a ni.