Lionel Messi chuan Liverpool centre-half Virgil van Dijk chu defender zingah chuan tha chungchuang a nih thu a sawi.

Season hmasa UEFA Champions League semi final-ah khan Netherlands defender leh Argentine forward te hi an intawng a. First leg-ah Barcelona chu 3-0 in an chak a, final an lut dawn emaw tih hnuah second leg-ah Liverpool chu 4-0 ngawtin an chak ve thung a ni.

Barcelona an hnehna kawngah Virgil van Dijk chu player pawimawh berte zinga mi a ni a, Anfield-ah Messi leh a pawlte chu a lo dang chat thei a. Hetianga a chet that em avang hian Messi chuan £75 million ($96 million) man defender hi a fak hle a ni.

Messi chuan, “Virgil van Dijk hi defender tha chungchuang tak mai, timing dik zet mai a ni a, lehlam pawl attacker lo hmachhawn hun te, lo tackle hun te hi a hre em em mai a ni,” a ti.

“A che rang a, amah hi a lian bawk a. Lian viau e ti lo chuan a muan phah chuang hauh si lo a, hei tak hi a thatna pakhat chu a ni a. A pen a hlawk em em a, hei vang hian a che hi a ran phah niin a lang a. Defence lamah a tha em em a, attacking lamah pawh a tha tih a hriat a, goal pawh a thun nual tawh a ni,” a ti bawk.

Van Dijk chauh lo pawh hi Messi chuan Dutch star tha tih a la nei a, tuna Camp Nou lama a khelhpui Frenkie de Jong chu a fak viau bawk a. De Jong hian nipui transfer window inhawn lai khan Ajax atangin Barcelona chu a zawm a, kum 22-a upa midfielder hi a team tharah a insiam rem hma viau a ni.

“Frenkie hi Barcelona kalphung ang deuh tho zawmtu Ajax atanga rawn lut a ni a, hei vang hian a tan chuan insiam rem hi a harsat loh phah a. Inkhelh dan kalphung inzul tak, ruahmanna pawh inang tak mai a lo than hnan tawh tlat a ni,” tiin Messi chuan a sawi.

“Ball chan tam hi a duh a, short pass a ti nasa a, amah hi a rang a, a tlan chak phian bawk a, Frenkie de Jong hi chu complete footballer a ni ber mai,” a ti bawk.