Valencia chuan coronavirus vanga an club sum dinhmun a tlak chhiat em avangin an player zawng zawng deuh thaw chu hralh chhuah an tum niin an sawi.

La Liga club Valencia hi coronavirus darh vangin an dinhmun a that loh phah hle a, Europe khawmualpuia football club dangte ang bawkin an sum dinhmun a tlahniam em em a. Kawng hrang hranga sum tuak dan an ngaihtuah nasa hle a, hetiang tur hian an player neih sa zawng zawng deuh thaw chu hralh chhuah mai an rilruk phah a ni.

Spanish club hian midfielder Francis Coquelin chu La Liga club dang Villarreal hnenah an hralh tawh a. Coquelin an hralh avang hian an club neitu Peter Lim chu club a enkawl dan a fuh lo an tih em avangin an sawisel nasat phah hle.

Francis Coquelin hi kum 10 zet chu Arsenal player a ni thin a, 2018 ah khan Valencia hi £10.6 million in a zawm a. Spanish club a zawm hnuah hian khelmualah a inlan ve nual tawh a, tun season liam taah pawh khan inelna hrang hrangah game 36 chu a khel a. Valencia hian Coquelin an hralhna zat hi chiang takin an sawi lem lo a, chanchinbu thenkhat chuan £6 million niin an tar lang.

Season tawpah Valencia chu La Liga-ah pakuana an ni a, September thlaah khan an manager Marcelino chu an ban a, kumin July thlaah khan a hmun ruak luahtu Albert Celades chu a chhuak ve leh bawk a. Watford coach hlui Javi Gracia chu thlla hmasa tawp lamah khan an club enkawl tur hian an ruai leh a ni.

Spain rama chanchinbu thenkhatin an tar lan danin Valencia captain Dani Parejo pawhin Villarreal a zawm ve dawn a. Villarreal hi Valencia nena inel tak mai, club inhal zet mai an ni a, heti chung hian an captain ber chuan an hmelma club lam hi a pan dawn niin an tar lang a ni.

Club neitu Singapore billionaire Peter Lim chu Valencia tantute hian an ngaithei lo viau tawh a. Tun hnaia hetiang boruak an neih chhoh leh takah phei chuan sawiselna hi a nasat lehzual a rinawm hle.

Tun thla tir lamah khan Valencia hian Spain rama football huanga beiseiawm ber pawla ngaih Ferran Torres chu Manchester City hnenah £20.8 million in an lo hralh tawh bawk a ni.

An player zawng zawng deuh thaw hralh an rilruk lai hian Jose Gaya chiah chu hralh an tum loh niin an sawi a. Kum 25-a upa Gaya hi captain ni tur pawha an lo mitthla a nih thu sawiin, an hnena awm zui zel turin club thuneitute chuan an duh thu an sawi.