Sunday zingkar (zanin zanlai) hian heavyweight boxing nghahhlelhawm em em kan hmu leh dawn a, a vawi hnih nan Oleksandr Usyk leh Anthony Joshua te an inhmachhawn dawn.
Nikum September thla ni 25 khan, London-a Tottenham Hotspur Stadium-ah Usyk leh Joshua te hi an lo hmachhawn tawh a, hemi tum hian upset ropui thlengin Usyk hian unanimous decision-a hnehna changin, Joshua-a heavyweight title kawl lai pali WBA, IBF, WBO leh IBO title te a chhuhsak a, unified heavyweight champion a ni.
Tunah hian Saudi Arabia, Jeddah-a King Abdullah Sports City-ah an inhmachhawn leh dawn a, India-ah TV-a live en tur a awm dawn lova, mahse DAZN (India)-ah man tlawm te a subscribe-in a en theih dawn a, Sunday zing dar 3-ah main event hi a intan ang.
A chak loh hnuah, British boxer Joshua chuan a title hloh te neih kir leh ngei a tum avangin, rematch clause a neih a hmang tangkai nghal a, kumin kum tir lam khan inhnek leh tur ni zet mah se, Russia-in Usyk-a ram Ukraine a run avangin an sawn hla a ni.
Heavyweight boxer chawl ta Tyson Fury-a’n Ring Magazine title a kawl lai a dah awl avangin, Usyk leh Joshua rematch-a chak zawk zawk hian WBA, IBF, WBO leh IBO heavyweight title te bakah hian Ring Magazine heavyweight title an hlawhchhuak tel bawk dawn.
Kum 35 mi Usyk hian professional fight 19 a neih tawhah hnehna a la chang fai vek a, cruiserweight undisputed champion hlui a ni a, cruiserweight unified champion leh heavyweight champion ni thei mi tlem te zinga mi a ni.
Kum 32 mi Joshua hian professional fight 26 nei tawhin, heng zinga 24-ah hnehna a chang a, vawi hnih tlawm tawhin, Usyk bakah hian Andy Ruiz Jr. a hneh lo tawh bawk.
Southpaw boxer laka harsatna tawk thin Joshua hian, southpaw boxer che rang em em Usyk lakah hian hnehna a chang duh a nih chuan, a chak leh a thiamna bakah a finna zawng zawng a hman a ngai dawn chiang a, Usyk pawh hian uluk zawkin Joshua hmachhawn dan tur zir ngei dawn a, fight hmuhnawm tak kan hmuh a beiseiawm hle.
Usyk vs Joshua 2-ah hian sum a tam leh pek hle a, an rematch hi $150m man hu a ni a, fighter pahnih te hian $75m ve ve an dawng dawn nia sawi a ni a, Joshua erawh hi chuan sponsorship leh thildang atangin bonus $44m vel lai a dawn belh a rinawm bawk a ni.
Tale of the Tape:
