Ni 24, 2020 (Zirtawpni) chawhma dar 10:00 khan United Sports Association of Mizoram (USAM) chuan Chief Minister Pu Zoramthanga chu a office-ah hmuin Sports lama Mizoram hmasawnna tur hrang hrang ruahmanna an neihte an thlen.

USAM chuan Mizorama District hrang hrangah District Sports Office thuthmun neih vek chu sports hmasawnna tura bul pawimawh tak a nih thu Chief Minister hnenah an thlen a, Chief Minister chuan a theih ang anga, a tahtawla siam chhoh zel a nih tur thu a sawi.

Kum 1976 atanga din tawh Mizoram State Sports Council-in vawiin thlenga mahni puala building a la nei lo leh mi in luah hawha an awm reng mai chu pawi an tih thu sawiin Sports Minister Pu Robert Romawia hnenah pawh hemi chungchang hi an thlen tawh thu USAM chuan an sawi a, hma lo lakpui a tiam avanga lawmthu sawi chungin muangchang lova Office sak a nih ngei theih nan Chief Minister hnenah hian an thlen bawk.

Kum 2019-ah India ram state lian zawkte pawhina an buatsaih hleih theih loh State Games hlawhtling tak neih a ni tawh a, hei hi chawlhsan mai lova kum khat dan emaw, kum hnih danah emaw tal neih a nih theih nan hma lakpui turin Chief Minister an sawm a, Mizoram sports hmasawnna tura pawimawh tak pakhat Seminar on Sports Development in Mizoram chu August 19 atanga 21, 2020 chhungin Aijal Club-ah neih an tum a, Chief Minister chu khual lian atan USAM chuan an sawm nghal a.

Chief Minister Pu Zoramthanga chuan Covid 19 avangin hmalakna tur ruahmanna tam tak an neihte kalpui hleih theih a nih loh thu sawiin USAM-in mamawh leh harsatna an thlente hrileng a zawh hunah chuan chak taka bawhzui sak a tiam a ni.