23 Jul 2020 04:24

inkhel

USAM hmalakna tur Sports Minister ho in an sawi

Mizorama State Level Sports Association 32 inhlawmkhawm pawl United Sports Association of Mizoram (USAM) hruaitute chuan ni 23, 2020 (Ningani) khan Sports Minister leh MSSC President ni bawk Pu Robert Romawia Royte chu a office chamber-ah hmuin Mizoram Sports hmasawnna tura a hnathawh leh hmalakna hrang hrangah lawmthu sawi chungin ruahmanna leh hmachhawp an neihte an thlen bawk.

USAM hruaitute chuan kum 1976 atanga din tawh infiammite inpui Mizoram State Sports Council-in vawiin thlenga mahni puala Office Building a la nei lo chu an vei thu Sports Minister hnenah an thlen a, Sports Minister chuan theih tawpa hma a lak zel dawn thu sawiin State Level Sports Association hrang hrangte nen thuthmuna an hman theih khawpa siam nise a duh thu a sawi.

USAM hruaitute chuan executive meeting-in a an lo rel tawh anga Sports Association te tan Sports Minister hova Seminar on Sports Development buatsaih an duh thu an thlen bawk a, Sports Minister chuan Mizoram Sports hmasawna tura thil pawimawh tak a nih thu leh a phurpui thu a sawi a, remruat ho nghalin August thla chawhnu lamah neih nise an ti.

Sports Industry chungchanga Sports Minister hmalakna fakin USAM chuan Sports Association, club leh player thleng pawha hamthatna tam tak dawn theih a ni ta chu Mizoram infiamna khawvela bung thar kaina a ni an ti a, Sports Minister chu Mizoram Sports hmasawnna tura a hmalaknaah theihtawp chhuaha tawiawm zel an tum thu an sawi bawk a ni.