14 Feb 2020 04:26

inkhel

Usain Bolt aia tlan chak lawi pu

Usain Bolt chu khawvela tlan chak ber tiin mi tinin an hria a, tun hnaiah a aia tlan chak nia sawi a awm a. Karnataka thingtlang pa Srinivasa Gowda chu Jamaican sprinter ai hian an tlan chak niin an sawi.

Karnataka huam chhunga lawi intlansiak an buatsaih thinah Srinivasa Gowda hi a tlan chak hle mai a, a lawi chu tlanpuiin, second 13.62 chhung lekin 142.50 meter a tlan thleng hman a ni.

Srinivasa Gowda hian second 13.62 chhunga meter 142.50 a tlan thlen hman chuan meter 100 chu 9.55 velah a tlan thleng thei tihna a ni dawn a, hei hi Usain Bolt-a record siam aiin second .03 in a rang zawk a ni.

Gowda leh Bolt te tlan dan leh an tlanna hmun hi a inang lo hle a, khaikhin chi vak pawh a nih lohna lai chu a awm tho a. Usain Bolt chu track changkang tak, intlansiakna tur atana a hranpaa siam liau liauah a tlan thin a, Srinivasa Gowda erawh chu mual zau tak, chirhdiak leh vaivut inpawlhna hmun, rualrem lo takah a nih mai bakah, lawi sirah a tlan ve thung a ni.

Lawi intlansiak hi Kambala tiin an sawi thin a, hei hi tun hma atang tawha an lo tih thin niin, Mangalore leh Udupi huam chhungah an uar deuh ber a. Tun thlengin hetianga lawi intlansiak hi an la tih chhunzawm zel a ni.

Lawi pu kum 28-a upa hi Usain Bolt khum tum hrim hrimin a tlan hauh lo a, chutiang bawkin hetiang lampang hi tu rilruah mah a lang hek lo a. An intlansiak zawhah a tlan chak em avang leh record thar te a siam avangin mi beng a verh chho a, a hnuah Usain Bolt nen hian an khaikhin phah a ni.