Jamaican sprinter Usain Bolt chuan vawiin (August 21) ah hian kum 33 a tling ve ta a. Khawvela infiammi ropui berte zinga sawi tel loh theih loh, vawi 8 ngawt Olympic gold medal la thei chanchin thenkhat chu a piancham pual hian han tarlang ila.
Usain Bolt hi khawvel mi tam zawk chuan tlan chak a ni tih kan hre chiang hlawm hle a, hemi piah lamah hian cricket ngainatu a ni a, hetiang lampang hi chu hria an tam lo viau thung.
Intlansiak lamah chuan kawng hrang hrangah world record siamtu a ni a, 100 metres, 200 metres leh 4x100 metres relay-ah te record hi a chelh mek a. Sprinter zingah chuan Bolt chiah hi 100 metres leh 200 metres-ah te a zawna vawi thum Olympic gold medal la thei a la ni a, 2008, 2012 leh 2016 ah te khan gold medal hi a la thei a ni a. Tun dinhmunah Usain Bolt hian world record 19 zet chu a la chelh mek a ni.
Bolt hian a hmain gold medal 9 a lo la tawh a, 2008 relay-ah a teammate chu damdawi hman phal loh a hman avangin an disqualify a, hei vang hian gold medal an lak loh phah a ni.
A naupan lai chuan Usain Bolt hian cricket leh football a khel nasa ve thei hle a. An cricket coach chuan Bolt chu field chhungah tlan chak a ti thei hle a, hei vang hian intlansiak lampanga inhmang turin a fuih chho a ni.
Cricket khelh chu nuam a ti em em a, tun hnuah Bolt hian sprinter chu ni lo se cricket a khelh nasat tur thu sawiin, hetiang lamah hian inhmang ta se fast bowler a nih tur thu a sawi chhuak a. A tet lai chuan Pakistan cricket team chu a tan thei hle a, Pakistani pacer thin Waqar Younis chu a duh ber a ni thin.
2009 kumah khan charity cricket match an khel a, hetah hian Usain Bolt chuan West Indies cricketer Chris Gayle chu a vawm chhuak a. Gayle-a ball vawm atangin 6-run a siam zui bawk a ni.
Bolt hian Twenty20 format hi a ngaina em em bawk a, Australian spinner lar thin Shane Warne hnenah pawh khan Big Bash League-a tel ve a duh thu te pawh a lo sawi tawh a ni.
Sachin Tendulkar kha a ngaihsan berte zingah a tel bawk a. Chris Gayle leh Australian opener Matthew Hayden te pawh cricket khel thin zinga a duh zualte an ni.
Football pawh a tuipui em em a, thawk khat lai khan football club lian ve deuh zawm dan kawng a zawng nasa hle a, Manchester United zawm theih chu a duh ber a ni a. Club thenkhatah trial te a nei kual a, mahse a tawpah chuan khawi club nen mah thuthlung an ziak thei ta lo.
London khawpuia 2017 IAAF World Athletics Championships-ah a tawpna atan Usain Bolt chu a inlan a, hemi hnuah hian intlansiak chu a chawlhsan zui a. Chawlh a puan hian kum 31-a upa a ni.
2002 kumah khan Usain Bolt chu World Junior gold medallist niin, hetiang ti thei naupang ber a ni a. Hemi tum atang hian khawvel chuan Jamaica ram atanga mipa naupang tlan chak tak mai chu an hmelhriat tan a, he mipa naupang hian intlansiak kaihhnawihah khawvel a la awp dawn tih erawh an la hre lo a ni.
2007 kuma World Championship-ah khan Bolt chuan silver medal pahnih a la a, 2017 kumah bronze medal a la bawk a. Heng bak hi chu medal a lak zawng zawngte kha gold medal vek an ni a. 2011 kumah khan South Korea-ah 100 metres-ah an disqualify a, hemi tum tih lohah chuan gold medal a la zel a ni ber.
A vanglai hian tawngkam chhinchhiahtlak tak tak a nei nual a, thenkhat han tarlang tel ila.
- “Intlansiak dawn vel hi ngaihtuah buai loh tur, intlansiak tawp dan tur zawk hi rilruah a lian ber tur a ni.”
- ”Ka hmaah eng anga hlaah pawh awm mah la, ka um pha dawn tho che.”
- “A tawpna ber hi a pawimawh ber. Chutiang hunah chauh chuan hmasawn kan ngai a ni tih kan hre chhuak thin.”
- “Awlsam leh hahdam hi thlan loh tur. Thiamna hi chu kan neih sa a ni a, kan theihna tuaihnum thei tur chuan rim taka inpuahchah a ngai.”
- “Suangtuahna hi a thlawn a ni a. Thil tum bik erawhin man a nei a. A thlawnin kan inngaihtuah veng veng thei a, kan thil tum tihlawhtling tur chuan tha sen a ngai thin.”
- “Thil tih theih leh tih theih loh inkar chu tumruhna chiahin a dal.”
- “Kei aia bul tan tha thei hi tam tak an awm a, kei chuan hnu ka khar tha thei hle.”
World Records:
100m - 9.58 seconds at Berlin in 2009
200m - 19.19 seconds at Berlin in 2009
4x100m - 36.84 seconds at London in 2012
Olympic Gold Medals:
100m - 9.69 seconds at Beijing in 2008
100m - 9.63 seconds at London in 2012
100m - 9.81 seconds at Rio in 2016
200m - 19.30 seconds at Beijing in 2008
200m - 19.32 seconds at London in 2012
200m - 19.78 seconds at Rio in 2016
4x100m - 37.10 seconds at Beijing in 2008
4x100m - 36.84 seconds at London in 2012
4x100m - 37.27 seconds at Rio in 2016
World Championship Gold Medals:
100m - 9.58 seconds at Berlin in 2009
100m - 9.77 seconds at Moscow in 2013
100m - 9.79 seconds at Beijing in 2015
200m - 19.19 seconds at Berlin in 2009
200m - 19.40 seconds at Daeguin in2011
200m - 19.66 seconds at Moscow, 2013
200m - 19.55 seconds: Beijing in 2015
4x100m - 37.31 seconds at Berlin, 2009
4x100m - 37.04 seconds at Daegu, 2011
4x100m - 37.36 seconds at Moscow in 2013
4x100m - 37.36 seconds at Beijing in 2015
World Junior Records:
200m - 19.93 seconds at Kingston in 2002
World Junior Championship Gold Medals
200m - 20.61 seconds at Kingston in 2004