England coach Gareth Southgate chuan England-in Wembley Stadium-a USA an lo mikhual huna Three Lions captain tur a sawi a, Harry Kane leh Wayne Rooney-te hming a lang lo ve ve.

Wembley Stadium-ah hian Manchester City player Fabian Delph chuan Three Lions hi a captain dawn tih Southgate chuan a sawi a, second half-a Rooney dah luh a nih hunah Deplh hian captain arm band hi England leh Manchester United captain hlui hnenah hian a hlan dawn thung.

Southgate chuan England tana a game 120-na khel tur Rooney chuan jersey no.10 a hak tur thu a sawi bawk, Southgate chuan USA nena an inkhelh tur chungchang sawiin, “USA lakah Fabian Delph chu kan captain a ni dawn a, player-te chuan Wayne Rooney chu no.10 ha turin an duh bawk a, a phu kan ti tlang hle.

A vawikhat nan Fabian hian a ram tan captain arm-band a hreng dawn a, a hlawhchhuak a ni. Player tha tak a nih bakah mi tha tak a ni tel bawk. England team-ah hian Fabian hi hruaitu tha tak a ni a, thawhpui pawh a nuam ka ti hle. England captaincy hi miin a phu tak tak a nih loh chuan pek ngawt chi a ni lova, Fabian hi chuan a phu takzet a, tun nipuia kan hlawhtlin chhanah pawh khan a thawhhlawk ber zinga mi a ni,” a ti.

He game hi Rooney-a thlahna game a nih bawk avangin Rooney hi second half-ah luhtir a ni dawn a, guard of honour pek a ni dawn bawk a ni.