Oscar De La Hoya chuan United States of America President nih a hreh loh thu sawiin, inthlan huna America ram lal ber ni thei tura chuh ve chu pawi a tih loh thu a sawi.

Olympic gold medalist, division ruk ngawtah world boxing champion ni bawk, Hall of Famer ni bawk hian chanchinthar lakhawmtute a kawm a, hetah hian 2020 a US President tur an thlan hunah din ve mai a hreh loh thu a sawi a ni.

De La Hoya chuan, “US President nih hi ka tum ve dawn emaw ni ka ti tak tak a. Hei tak hi kan ram thatna a ni a. Arnold Schwarzenegger pawh governor a ni thei a, Donald Trump pawh President a ni thei bawk a, Olympic gold medal dawngtu, kum 35 aia upa, US khua leh tui ni bawk, Mexican-American tan hian eng vangin nge President nih hi a theih loh bik ang?” a ti a ni.

Kum 45-a upa De La Hoya hian kum eng emaw zat kalta atang khan US President nih chungchang hi a lo ngaihtuah tawh thin niin a sawi a. A ding ve tak tak dawn a nih chuan Democrat aiawha a din tur thu sawiin, pawisa lampangah chuan harsatna a awm dawn lo niin a sawi bawk.

A hun laia boxer lar ber pawl De La Hoya hian ring pawn lamah hming mawi lohna a nei ve fo a, kawppui laka rinawm loh lampang leh zu leh ruihtheih thil dang avang te pawhin a lo hmingchhe zeuh zeuh tawh a. Hetiang hi hun kal tawhah lo ni thin mahse inthlan dawna a ding a nih chuan mi thlawp a hlawh viau dawn niin a sawi a ni.

“Ka upa deuh deuh a, ka fin phah zel a. Ka fin belh zel vang hian ka rilru put hmang pawh a puitling sawt viau bawk a. Ka rilru a puitlin tak tak hnuah hian mi tam takin President nih tum tur hian min nawr ta fo mai a. President ka nih theih chuan danglamna duhawm tak ka thlen thei dawn a ni tih hi an ring nghet tlat a ni,” tiin a sawi.