22 Aug 2019 05:16

inkhel

US Open top seed Novak Djokovic leh Naomi Osaka

Novak Djokovic leh Naomi Osaka te chu US Open khelh turah top seed an ni a, kar leh Thawhtanni atang khian Flushing Meadows-ah an khel tan ang.

Mipa top seed, World No. 1 Novak Djokovic chuan New York khawpuiah Grand Slam title 17 lak theih ngei tumin beihpui a thlak dawn a, Spanish star Rafael Nadal chu 2nd seed niin, Swiss master Roger Federer chu 3rd seed a ni bawk a. Federer hian Grand Slam title 21-na lak a tum ve dawn bawk a ni.

Hmeichhe lamah chuan World No. 1 Naomi Osaka chu top seed a ni a, 2018 runner-up Serena Williams chu 8th seed a ni a. Japanese ace Osaka hian nikumah khan Serena hi hnehin Grand Slam title chu a vawi khatna atan a la a. Kumin January thlaah Australian Open title a la zui leh bawk a ni.

Australian star, French Open champion Ashleigh Barty chu 2nd seed a ni a, Czech Republic star Karolina Pliskova chu 3rd seed niin, Romanian star, Wimbledon champion Simona Halep chu 4th seed a ni.

Men's singles

4 - Djokovic hi Grand Slam hnuhnung pangaah vawi li a chak a, Rafael Nadal chu vawi khat (Kumin French Open) a chak a ni.

2 - World number one Djokovic chuan kum zabi 21-naa Flushing Meadows title humhim thei pahnihna nih a tum hle a. Roger Federer chuan (2004-2008) a lo humhim tawh a ni.

35 - Open Era-ah chuan US Open champion thei upa ber chu Ken Roswell niin, 1970 kumah khan kum 35, thla 10 leh ni 11 mi niin a champion a. Kum 38-a upa Roger Federer hi a champion a nih chuan record thar a ni ang.

5 - Mipa pathum chu he tournament-ah hian vawi 5 an champion thei a, record chelh mektute chu Jimmy Connors, Pete Sampras leh Roger Federer te an ni.

8 - Djokovic chuan US Open title vawi thum a la tawh a, Open Era-ah chuan final khel hnem ber zingah a tel a, Ivan Lendl leh Pete Sampras te nen vawi 8 an khel tawh a ni.

0 - US Open chiah hi Grand Slam zingah chuan player te’n set hloh miah loa title an la lak theih lohna awm chhun a ni.

61 - Wimbledon 2004 atang khan Djokovic, Federer leh Nadal te pathum zinga tu emaw tal hian tournament lian deuhah semi final an la lut ziah a. An pathum zinga pakhatin semi final an luh hi a zawnin tournament 61 a tling tawh a ni.

Women's singles

3 - Nikuma US Open title a lak bakah Naomi Osaka chuan kuminah Australian Open title a la leh bawk a, heng bakah hi chuan Grand Slam third round a la pel thei lo a, Wimbledon-ah phei chuan game hmasa berah a chak lo nghal.

33 - Serena Williams chu Federer ang bawkin hmeichhe zinga US Open champion thei upa ber ni thei dinhmunah a ding a. Record ding lai chu 2015 khan Flavia Pennetta chuan kum 33, thla 6 leh ni 18 mi niin a lo siam a, hei hi kum 37-a upa Serena hian a khum thei dawn chiang hle.

2 - Simona Halep a champion a nih chuan Kim Clijsters (2010 US Open, 2011 Australian Open) hnua European star zinga a zawna Grand Slam title la leh thei hmasa ber a ni thei ang.

24 - Serena Williams chuan Grand Slam title 23 a nei tawh a, Open Era-ah chuan title nei hnem ber niin, a champion a nih chuan all-time record siamtu Margret Court chu a nihrual thei dawn a ni.

10 - American star Serena hian tun hnaia major tournament 10 ah title a la thei miah lo a, 2002 hnuah champion loa a tal rei ber tum a la ni.